El Real Oviedo y Santi Cazorla ponen puntu final a una de les histories más especiales que vivió l'oviedismu na so hestoria reciente. El futbolista, nacíu en Lugo de Llanera, zarró la so etapa como futbolista profesional dempués de tres temporaes vistiendo la elástica azul. 

Formáu nes categoríes inferiores de la entidá carbayona, l'asturianu dio los sos primeros pasos en El Requexón enantes d'entamar una carrera estraordinaria que-y convirtió nuna referencia del fútbol mundial. El so talentu brilló en clubes como'l Villarreal CF, el Recreativo de Huelva, el Málaga CF, l'Arsenal FC y l'Al Sadd SC, amás de dexar una güeyada inesborrable cola Selección Española, cola que conquistó dos Eurocopes y formó parte d'una de les xeneraciones más brillantes de la hestoria del fútbol.

Sicasí, había un suañu que quedaba pendiente: vestir la camiseta del primer equipu del Real Oviedo. El 16 d'agostu de 2023, con una trayeutoria repleta d'éxitos y el reconocimientu de tol mundu del fútbol, Santi decidió tornar al Club de la so vida.

El so regresu foi un actu d'oviedismu en estáu puru. Cazorla decidió volver percibiendo'l salariu mínimu permitíu pola competición y cedió al Club tolos sos derechos d'imaxe. A cambéu, namái pidió que'l 10% de les ventes de la so camiseta se dedicara íntegramente a la cantera del Real Oviedo, pa contribuir al crecimientu de les futures xeneraciones de futbolistes azules.

Dende'l primer día que tornó, el centrucampista exerció como lo que ye: una referencia. El so lideralgu, compromisu y calidá convertiéronse nun exemplu pal vestiariu y nun motivu d'ilusión pa una afición que recuperaba a ún de los sos.

El destín quixo reservar el meyor desenlaze. Dempués de dos temporaes defendiendo'l nuestru escudu, Santi Cazorla foi una pieza fundamental na consecución del ascensu a Primera División, un llogru llargamente esperáu por tol oviedismu y col que se culmina l'oxetivu que-y llevó a tornar a casa. Un final a la altura d'una hestoria que paecía escrita pa acabar asina.

Güei fina la so carrera como futbolista del Real Oviedo, pero non el so vínculu col Club. Dempués de toa una vida dedicada al fútbol, llega'l momentu de detese, disfrutar d'un merecíu descansu y reflexonar sobre'l siguiente pasu. Cuando llegue esi momentu, Santi Cazorla sabe que les puertes del Real Oviedo van tar siempre abiertes pa recibilu. Porque esta siempre va ser la so casa y el Club desea poder siguir compartiendo con Santi'l futuru, dende'l llugar, faceta y trabayu que él decida y-y faiga feliz.

Gracies por creer. 
Gracies por tornar.
Gracies por facer realidad el suañu de tol oviedismu.