El Real Oviedo vivió esti martes una xornada pa la hestoria. Nel día grande d'Asturies y coincidiendo col añu nel que l'entidá azul celebra los sos cien años de vida, el club recibió la Medaya d'Asturies, la máxima distinción que concede'l Principáu.

El presidente del Grupu Pachuca y máximu accionista del Real Oviedo, Jesús Martínez Patiño, foi l'encargáu de recoyer el reconocimientu en representación de l'entidá mientres l'actu institucional nel que'l presidente del Principáu, Adrián Barbón, fixo entrega de la Medaya y del diploma acreditativu.

Un reconocimientu que pon en valor la trayeutoria d'un club que, dende la so fundación en 1926, forma parte de la hestoria d'Asturies y que mientres un sieglu trespasó lo estrictamente deportivu pa convertise nuna de les grandes señes d'identidá de la rexón.

La distinción llega, amás, nun momentu especialmente significativu pal oviedismu. El Real Oviedo celebra'l so Centenariu y faino mirando al futuru, pero ensin escaecer un camín nel que hubo grandes ésitos, momentos inolvidables y tamién etapes d'enorme dificultá nes que'l sofitu de la so afición y de la sociedá asturiana resultó fundamental.

L'entrega de la Medaya tuvo llugar nuna fecha especialmente señalada pa tolos asturianos. El 8 de setiembre, Día d'Asturies y festividá de Nuestra Señora de Cuadonga, sirvió como escenariu pa reconocer públicamente'l vínculu que'l Real Oviedo mantuvo mientres un sieglu cola so tierra.

Dende aquel 1926 nel que nació l'entidá hasta los nuesos díes, xeneraciones d'oviedistes acompañaron al equipu y convirtieron el sentimientu azul nuna parte inseparable de la vida de la ciudá y d'Asturies.

Nel añu del Centenariu, la Medaya d'Asturies súmase asina a una celebración que pertenez a tolos que fixeron posible la hestoria del Real Oviedo: xugadores, entrenadores, trabayadores, dirixentes y, especialmente, una afición que mientres cien años estuvo al llau del escudu.

La xornada concluyó cola intervención del presidente del Principáu, que agradeció a los premiaos y dedicó-yos unes bones pallabres a cada ún d'ellos, y la interpretación del Himnu d'Asturies, poniendo'l broche a un día que yá forma parte de la hestoria del Real Oviedo.