El Real Oviedo desveló esti sábadu les equipaciones que van vestir los nuesos equipos mientres la temporada 2026/2027. Baxo'l lema y hashtag #LoRealPasaEnCasa, el Club presentó, al traviés d'un videu, les tres camisetes que van acompañar al oviedismu a lo llargo d'esti nuevu cursu.
Les nueves equipaciones del Real Oviedo pa la temporada 2026/27 incorporen un escudu termoadhesivu con efeutu 3D de TPU flexible, que da un acabáu d'alta calidá ensin renunciar a la comodidá. Amás, presenten un corte Slim y tán confeccionaes con texíu 100 % poliéster recicláu, reafirmando'l compromisu del Club cola sostenibilidá.
Nel apartáu técnicu, les camisetes cuenten cola tecnoloxía climacool, diseñada pa favorecer el máximu rendimientu. Gracies a un sistema de microporos y paneles de malla distribuyíos estratégicamente, el texíu optimiza la transpiración, facilita la circulación del aire y ayuda a caltener la piel seca, regulando la temperatura corporal mientres la práctica deportiva.
La primer equipación va tar a la venta pa tolos oviedistes a partir del próximu 16 de xunetu, fecha na que va poder mercase nes tendes oficiales del Club.
Asina mesmu, mientres la temporada 2026/27, el Real Oviedo va caltener un vínculu especial cola so hestoria. Amás de les tres equipaciones oficiales, el primer equipu va volver a vestir la equipación del Centenariu en dellos partíos oficiales. Una decisión motivada pola estraordinaria acoyida que tuvo ente'l oviedismu y que va permitir siguir dando protagonismu a una camiseta que simboliza los cien años d'hestoria del Club.
Con #LoRealPasaEnCasa, el Real Oviedo entama una nueva temporada cola ilusión renovada y l'orgullu de representar unos colores que formen parte de la hestoria y del corazón de miles d'oviedistes. Porque, una vegada más, lo real pasa en casa.
