La campaña d'abonaos 26/27, tres finar na nueche d'ayeri'l periodu de renovaciones, algamando un total de 25.501 abonaos, entamó güei un periodu de pausa temporal pa proceder a la lliberación de los asientos d'aquellos abonaos que nun renovaren dientro del plazu establecíu.
Esti procesu permitirá ordenar les siguientes fases de la campaña, marcaes pol regresu de los abonaos afectaos de la Tribuna Lángara, la xestión de cambeos d'asientu pa tolos abonaos y la posterior comunicación de les places disponibles pa los Oviedistes.
Mañana martes, 30 de xunu, abrirá'l segundu y últimu plazu reserváu exclusivamente pa los 356 abonaos afectaos poles obres de la temporada 2023/24 na Tribuna Lángara, col oxetivu de que puedan regresar a la so ubicación orixinal.
Cambeos d'asientu
Del 1 al 3 de xunetu xestionaránse los cambeos d'asientu solicitaos mediante cita previa al traviés de info.realoviedo.es. Estos cambeos van tar siempre condicionaos a la disponibilidá real esistente tres la lliberación de places.
Tres la renovación de 25.501 abonaos, l'estáu actual del aforu presenta una ocupación prácticamente completa. La disponibilidá ye bien llindada, con daqué más de marxe nes zones de Presidencial, Aramo y Fondo Sur.
El Club ruega a los abonaos que respeten los horarios asignaos nes sos cites previes pa garantizar una atención ordenada y eficaz. Mientres estos trés primeros díes nun se podrá garantizar la atención a abonaos ensin cita previa.
L'horariu ye de 10 a 18h na Sala d'atención al Oviedista asitiada na puerta 15 del Carlos Tartiere.
Una vegada acabáu esti periodu inicial, el Real Oviedo va siguir trabayando hasta l'entamu de la temporada pa atender les solicitúes de los sos abonaos. Pa ello, recomienda usar el sistema habilitáu en info.realoviedo.es, tanto pa declarar la intención de camudar d'asientu como pa comunicar una posible permuta d'ubicación con otru abonáu.
Siguientes pasos pa los oviedistes
Tal como se anunció anteriormente, el Club va informar el próximu 4 de xunetu de la cifra de places disponibles pa posibles nueves altes d'abonu, una vegada analizaes toles opciones y col oxetivu de maximizar el númberu d'oviedistes que puedan acceder a la condición d'abonáu.
A partir del 6 de xunetu entamará'l turnu de posibles altes dirixíu a los Carnets Oviedistes de la temporada pasada, siguiendo de manera rigurosa l'orde d'espera establecíu por númberu d'oviedista.
El club va contautar de manera direuta con ellos por corréu electrónicu, teléfonu o WhatsApp pa informar del procedimientu d'ubicación y adquisición del so abonu.
