Tal día como güei, un 30 de xunu, nel añu 1985, el Real Oviedo conquistaba la Copa de la Lliga de Segunda División al empatar frente al Atlético Madrileñu nel estadiu Vicente Calderón, na capital d'España.

La final d'esta competición disputóse a doble partíu. El partíu d'ida xugárase nel feudu oviedista, el estadiu Carlos Tartiere de Buenavista, onde'l equipu carbayón impúxose por 1-0, con gol de García Barrero.

Nel partíu de vuelta, el Real Oviedo, cuyo entrenador yera José Luis Romero, presentó el siguiente once titular: Viti, Juanito, Vili, Eizmendi, Herrero, Berto, Hevia, Arias, Blanco, García Barrero, Herrera. Nel minutu 79 Cárdeno sustituyó a García Barrero. Y nel minutu 80 Muñoz remplazó a Hevia.

A los 49 minutos de partíu, García Barrero punxo'l 0-1 nel marcador. Nel minutu 50, l'Atlético Madrileñu llogró empatar. Col resultáu de 1-1 finalizó'l partíu, polo que'l Real Oviedo fíxose col títulu de la Copa de la Lliga, competición que s'instaurara nel fútbol español nel añu 1982 y que se disputaba pol sistema d'eliminatories a doble partíu.

La Copa de la Lliga de Segunda División yera'l sestu campeonatu nacional llográu pol Real Oviedo, que yá había consiguir el títulu de campeón de Lliga de Segunda en 1933, 1952, 1958, 1972 y 1975.

La fotografía que ilustra esti testu amuesa a los futbolistes del Real Oviedo (dalgún d'ellos vistíu de calle) sobre'l terrén de xuegu del Vicente Calderón tres recibir el troféu de campeón de la Copa de la Lliga en 1985.