Goretti Neira (07/08/2000, La Coruña) conviértese en nueva xugadora del Real Oviedo Femenín pa la temporada 2026/2027.

La llateral gallega llega procedente del Real Avilés pa reforzar el carril esquierdu del conxuntu azul. Tres consolidase nes caberes temporaes como una de les llaterales más destacaes de la categoría, Goretti afronta un nuevu retu na so carrera deportiva cola camiseta del Real Oviedo.

Trátase d'una futbolista intensa, agresiva nos duelos y con una gran capacidá pa incorporase al ataque, onde destaca pola so fondura y por ser una de les xugadores que más asistencies xenera na competición. La so bona interpretación del xuegu, xunida a la so fiabilidá defensiva y competitividá, conviértenla nuna llateral bien completa.

Durante la pasada temporada foi una pieza fundamental nel Real Avilés, disputando tolos minutos de los alcuentros lligueros salvo ún, que se perdió por sanción, demostrando asina la so regularidá y la so importancia dientro del equipu.

Cola so incorporación, el Real Oviedo suma una futbolista contrastada na categoría, con esperiencia, percorríu y capacidá pa aportar solidez defensiva y proyección ofensiva pel llau esquierdu.