El Real Oviedo enfréntase esti sábadu al so primer partíu de pretemporada nel Carlos Tartiere, onde s'enfrentará al Deportivo de La Coruña. Na víspera del alcuentru, Julián Calero compareció na sala de prensa d'El Requexón pa analizar les primeres selmanes de trabayu, valorar el mercáu de fichaxes y esplicar cuál ye la identidá que quier implantar nel equipu de cara al entamu de la temporada.

El técnicu azul entamó faciendo un balance mui positivu de la so llegada al club. Anque apenas lleva unes selmanes al frente del equipu, reconoció que la so adaptación foi muncho más sencilla de lo que esperaba gracies a que conoz mui bien tanto el Real Oviedo como la ciudá. "Debería dicir que me estoy adaptando, pero nun ye verdá. Tengo la ventaxa de conocer el Club y la ciudá. Fueron selmanes mui bones y tamos centraos en tresmitir al xugador la nuestra idea de trabayu", esplicó.

Unu de los mensaxes más repitíos mientres la so comparecencia foi la necesidá de construir un equipu con una identidá mui marcada. Calero quier un Oviedo reconocible dende'l primer día, intensu na presión, sólidu na defensa y con personalidá cuando tenga'l balón. "Quiero que la xente disfrute viendo competir al so equipu, con una idea mui clara. Nun renunciamos a ser un equipu fuerte ensin balón nin poderosu con balón. Tamos intentando automatizar munchos aspectos porque l'entamu de la competición ta mui cerca", señaló.

Preguntáu polos oxetivos de la temporada, l'entrenador evitó falar de la clásica cifra de los 50 puntos pa asegurar la permanencia. "Nun me presten esi tipu de retóriques. El mio oxetivu ye que l'equipu tea preparáu pa la primer xornada y que'l Tartiere vea un equipu con un espíu competitivu diferente, con una mentalidá ganadora", afirmó.

Otru de los temes protagonistes foi'l mercáu de fichaxes. Anque se mostró satisfechu coles incorporaciones feches hasta'l momentu, dexó claro que la plantiya entá necesita dellos refuerzos pa afrontar con garanties una competición tan esixente como la Segunda División. "Toi contentu col que ta llegando, pero soi esixente. Necesitamos más xugadores porque esta categoría ye bien llarga", aseguró.

"Tamos intentando incorporar xugadores pa la parte d'arriba, tamién atrás y nel centru del campu. Cola llegada de Juan reforzamos el llateral izquierdu, pero hasta l'últimu día del mercáu tenemos que tar preparaos. El que tea equí tien que partise'l llombu por esti equipu", añadió.

Sobre'l amistosu d'esti sábadu frente al Deportivo de La Coruña, Calero confesó que-y fai especial ilusión volver al Carlos Tartiere, esta vuelta como entrenador del Real Oviedo, anque reconoció que l'equipu entá ta nuna fase bien temprana de la preparación.

"Vine munches vegaes como rival y siempre tratáronme con muncho respetu. Tengo munches ganes de volver, anque preocúpame'l nivel que podamos ofrecer porque namái llevamos un partíu de pretemporada. Hubiérame prestáu llegar con más preparación, pero vamos dar too lo posible y quiero que tolos xugadores tengan minutos", esplicó.

Por último, el técnicu faló sobre la retirada de Santi Cazorla y desveló que dambos caltuvieron una llarga conversación enantes de que l'ovetense anunciara la so decisión definitiva.

"Falé con él durante una hora y espunxí-y toles posibilidaes. Ofrecí-y siguir como xugador y tamién incorporase al cuerpu técnicu. La decisión foi exclusivamente soya y respétola completamente. Toi convencíu de que va siguir bien vinculao al club y vamos tener una gran relación", concluyó.