El Real Oviedo sumó un puntu d'enorme méritu na so visita a Almería dempués de protagonizar una remontada espectacular nos instantes finales del alcuentru. Los azules, que afrontaben el choque cola ilusión d'encadenar la so tercer victoria consecutiva, tuvieron que remar a contracorriente mientres bona parte del partíu, pero nunca dexaron de creer y alcontraron en Jacobo al gran protagonista d'una nueche que paecía perdida.

L'alcuentru entamó cuesta arriba pa los carbayones, que se vieron superaos pol Almería mientres la primer metá. El conxuntu local alcontró enforma'l camín escontra la portería azul y abrió'l marcador per mediu d'Arribas, que culminó un centru con un remate dende dientro del área pa establecer el 1-0.

El Real Oviedo intentó reaccionar y alcontró nes botes d'Enzo Pérez una de les sos meyores oportunidaes pa devolver la igualdá al marcador. El canteranu protagonizó una bona aición individual que finó con un disparu que s'estrelló nel travesaeru. Los ovetenses rozaron l'empat, pero l'Almería nun falló na que tuvo poco dempués y anotó'l segundu gol pa poner l'alcuentru bien cuesta arriba pa los visitantes.

Col 2-0, el conxuntu oviedista intentó alcontrar un gol que-y permitiera metese otra vuelta nel partíu, anque nun lo llogró enantes del descansu. Los asturianos marcharon al vestiariu cola necesidá de camudar la dinámica del alcuentru pa caltener vives les sos opciones de puntuar.

Dempués del pasu pel vestiariu, el míster movió'l banquillu en busca d'una reacción. Calero introduxo dos cambios, dando entrada a Mingo y a Pablo Sáenz en sustitución de Reina y Aldasoro, cola intención d'aportar enerxía y alternatives al xuegu del equipu.

El Real Oviedo entamó a medrar col pasu de los minutos y a creer nes sos posibilidaes. Los azules adelantaron les sos intenciones, buscaron mayor presencia en campu contrariu y entamaron a xenerar situaciones pa recortar distancies. Posteriormente, Estanis Pedrola tamién s'incorporó al alcuentru pa reforzar l'ofensiva oviedista.

Una de les ocasiones más destacaes llegó nes botes de Mingo, cuyo intentu marchó per enriba del travesaeru. L'Oviedo insistía, ente que l'Almería intentaba aprovechar los espaciu a la contra, anque ensin xenerar demasiao peligru sobre la portería azul. El tiempu avanzaba y el marcador siguía reflexando un 2-0 que paecía condenar a los carbayones. Sicasí, l'equipu nun baxó los brazos y alcontró nos últimos minutos el premiu a la so insistencia.

La recta final del alcuentru foi una auténtica lloucura. Jacobo, que yera entráu al terrén de xuegu nos últimos cinco minutos, convirtióse nel protagonista absolutu del choque. Primero, con un magníficu gol dende la frontal del área, firmó'l 2-1 y devolvió l'esperanza al Real Oviedo.

Apenas un minutu dempués, nel 90, volvió apaecer l'atacante azul. Dempués de recibir un balón filtrao nel área, Jacobo buscó un centru. Sicasí, el so balón tocó nun defensor del Almería y superó al meta local pa poner el 2-2 nel marcador.

En cuestión d'instantes, el Real Oviedo pasó de vese con dos goles de desventaxa a celebrar un empaté que paecía imposible. El doblete de Jacobo premió la insistencia d'un equipu que creyó hasta l'últimu segundu y que alcontró nel tramu final la manera d'evitar la derrota y llevar un puntu de munchu méritu d'Almería.