El Real Oviedo estrenóse esti sábadu ante la so xente nel primer amistosu de pretemporada disputáu nel Carlos Tartiere. Tres varies selmanes de trabayu, l'equipu dirixíu por Julián Calero enfrentóse al Real Club Deportivo De La Coruña nun choque que valió pa coger ritmu y siguir probando coses de cara al entamu lligueru. 

Miguel Narváez, Samu, Dani Calvo, David Costas, Nacho Vidal, Aldasoro, Reina, Youness, Chaira, Pablo Sáenz y Isfan foi'l once escoyíu pol míster azul pa esti alcuentru. Dende'l pitíu inicial predominó la igualdá anque la posesión foi en gran parte pal conxuntu gallegu. Dues bones aiciones de Narváez evitaron el tanto coruñés, ente que al Oviedo costábalu llegar con peligru sobre la metá rival.

Cuando'l partíu s'aproximaba al descansu, Ilyas Chaira tuvo que ser sustituyíu tres un choque con un defensor gallegu. La peor noticia ensin dulda pa una primer parte que llegaba al so final con empate ensin goles.

Tres la reanudación, y dempués de la entrada de Jacobo por Ilyas, Víctor Mingo y Aisar tamién cuntaron con minutos. Aldasoro, con un llatigazu dende fuera del área, tuvo la más clara anque'l so remate estampóse nel largueru.

Yá nel 75', Calero introduxo al restu de futbolistes convocaos y l'once quedó con Narváez, Marco Esteban, Eze, Aisar, Berzal, Youness, Enzo, Cardero, Agudín, Diego Menéndez y Víctor Mingo. Nos últimos minutos apenes asocedieron aiciones de gol y el choque finó col empate inicial.

Próximu amistosu, el miércoles ante la SD Ponferradina nel Troféu Vega d'Anzo.