L'entrenador del Real Oviedo, Julián Calero, compareció dempués del empaté del so equipu nel UD Almería Stadium con una mezcla de satisfacción pola reacción del equipu y ambición pol resultáu. L'entrenador azul destacó la personalidá de los sos pa sobreponese a un 2-0, caltener la fe hasta'l final y facer un segundu tiempu de gran nivel ante ún de los rivales más esixentes de la categoría.
Calero punxo'l focu na respuesta del equipu dempués del descansu y na capacidá pa nun rindise cuando'l marcador yera adversu: «La pinta que tenía'l partíu y la dinámica dempués del 2-2 ye positiva. Creo que fiximos un segundu tiempu estraordinariu, ensin perder la fe y intentándolu. El primer tiempu, sinceramente, díxiles que nun sabíemos qué habíemos fechu mal pa perder 2-0».
L'entrenador azul destacó tamién los argumentos futbolísticos que atopó l'Oviedo pa competir y buscar la remontada, con ocasiones, intervenciones del guardameta rival y presencia ofensiva: «Evidentemente nun fuimos contundentes nos dos goles... pero un largueru, dos o tres parades d'Andrés y posesión ante un Almería que xuega a eso… ye pa tar satisfechu y contentu, pero a mí préstame ganar y faciendo esti partíu lo normal ye ganar. Dicho esto, dir 2-0 ante l'Almería nel minutu 87 lo normal ye perder y empatamos».
Calero quixo poner en valor, amás, l'actitú de tola plantiya y la convicción que caltuvo l'equipu incluso nos momentos más difíciles: «Tenemos que dir descubriéndonos. Yá dixi que éramos una caxa de bombones y tabamos por descubrir. Competitivamente tuvimos mui bien y hai que felicitar a toos, a los titulares y a los que entraron dempués. Los guajes nun se rindieron en nengún momentu y la vida ye esto, llevantate cuando cais y nun perder la fe».
El técnicu incidió en que l'equipu nun dexó nunca de creer nes sos posibilidaes y esplicó los riesgos asumíos pa tratar de camudar el rumbu del alcuentru: «Nun hubo nin un solu xugador que baxara la mirada, si lo hubiéramos fechu cáennos cinco. Fuimos a apretar a enriba, arriesgando nes tresiciones y tar atentos nes vixilancies. Fíximoslo y si hubiéramos marcáu enantes…».
Preguntáu pol retrasu del vuelu, Calero descartó que tuviera influencia nel rendimientu del equipu: «Lo del vuelu nun influyó en nada. Teníemos too mui controláu pa llegar con tiempu d'antelación, decidimos que los xugadores descansen nes sos camas y pa eso collimos un vuelu chárter. Llegamos con tiempu abondo y nun hai escusa nenguna».
Sobre'l valor del empaté, el técnicu reconoció que siempre prefier suma los tres puntos, anque consideró importante la respuesta del Real Oviedo frente a un rival que traviesa un bon momentu: «Val más ganar siempre. Ye ciertu que, na casa del líder, nesti estáu de forma y que too lo que-yos pasa ye coses bones, incluyíu güei. Nun ye casualidá, tán bien entrenaos y tienen una gran plantiya, asina que ye importantísimu'l puntu y ver que somos quien a competir bien».
Por último, Calero destacó la recuperación de Jacobo, al que vio otra vuelta cerca del nivel que llevó al club a apostar por él mientres el pasáu branu. L'entrenador recordó les sos cifres goleadores y la importancia que pue tener nos próximos compromisos.
«Güei recuperamos a Jacobo, güei volvió'l xugador al que fichamos en branu. Tien unes cifres de goles mui importantes y ye esti xugador, vino pa estes coses y hai que valoralo», concluyó finalmente.