L'entrenador del Real Oviedo, Julián Calero, valoró la contundente victoria por 0-3 ante'l Real Valladolid nel José Zorrilla, un resultáu que permite al conxuntu azul escalar puestos na clasificación y llograr el so segundu trunfu a domicíliu.

El técnicu oviedista destacó especialmente la solidez amosada pol so equipu mientres los 90 minutos. «Fiximos un partíu bien seriu. Quiciabes non brillante como podíe ser, pero bien seriu», esplicó Calero, que punxo en valor la capacidá del Oviedo pa sufrir cuando foi necesario, conceder poques ocasiones y, esta vuelta, aprovechar les sos oportunidaes.

El 0-3 supón amás un importante impulsu dempués de dellos partíos nos que al equipu-y faltara aciertu de cara a portería. Calero espera que la victoria pueda marcar un enantes y un dempués: "Espero que lo de güei seya un puntu d'inflexón". L'entrenador considera que l'equipu yá venía xenerando situaciones de peligru y que la falta de gol nun debía xenerar una preocupación escesiva. En Valladolid, amás, llegó l'aciertu a balón paráu, un aspeutu nel que l'Oviedo nun taba atopando recompensa.

Calero tamién quiso poner en valor l'esfuerciu realizáu polos sos xugadores nun partíu condicionáu poles altes temperatures. El calor obligó inclusive a sustituir a Reina al descansu dempués de sufrir un pequeñu mareu. "Los xugadores sufrieron muncho", señaló'l técnicu, que destacó'l compromisu colectivu amosáu mientres l'alcuentru.