El Real Oviedo nun pudo sumar na so visita a Sabadell y cayó derrotáu por 3-1 nun alcuentru nel que'l conxuntu azul quedó llueñe de la so meyor versión. El cuadru catalán dominó'l xuegu, controló la posesión y dispuso de les meyores ocasiones mientres bona parte del choque y llevóse un partíu mui trabayáu.

El partíu punxose pronto cuesta arriba pa los de Julián Calero. El Sabadell alcontró'l primer gol na primer metá después d'aprovechar un desaxuste nel marcu que aprofitó Gastón Vallés pa batir a Aarón Escandell. Apenas unos minutos dempués, los locales volvieron a golpiar a balón parao. Un saqué d'esquina alcontró a Óscar Sanz que remató de cabeza pa poner el 2-0 nel marcador.

L'Oviedo nun consiguió reaccionar enantes del descansu y marchó a los vestiarios con una desventaxa de dos goles, dempués d'una primer parte na que apenas consiguió xenerar peligru sobre la portería rival.

Tres la reanudación, el conxuntu azul dio un pasu alantre. L'entrada d'Estanis, Goti y Chris Ramos dende'l banquillu aportó mayor presencia ofensiva y foi precisamente l'atacante catalán quien s'encargó de recortar distancies. Gran gol del estremu que materializó una bona xugada individual pa poner el 2-1. Amás, instantes enantes Pablo Sáenz yá avisara con un llátigu dende la frontal que s'estrelló de forma violenta na madera.

Col marcador axustáu, l'equipu oviedista volcóse en busca del empat. Sicasí, el Sabadell supo aprovechar los espacios y alcontró'l tercer tantu cuando más insistía'l conxuntu azul. El 3-1 finó por sentenciar l'alcuentru y dexó ensin respuesta la reacción visitante.

Dura derrota en tierres catalanes. Agora, l'Oviedo yá pon la mirada na próxima xornada. L'equipu afrontará ún de los partíos más esperaos del calendariu: el derbi asturianu frente al Real Sporting de Xixón, que se disputará nel Carlos Tartiere.