Comparecía Julián Calero en rueda de prensa tres la derrota d'esta tarde en La Nova Creu Alta. El técnicu azul amosábase críticu col partíu disputáu polos sos homes ante'l CE Sabadell "un partíu mui malu, nun hai escuses pa la derrota".

Continuaba'l técnicu madrilanu analizando más al rodiu lo asocedíu mientres l'alcuentru. "Too lo que teníemos preparáu, controlar el xuegu del rival y poder xugar. Nun conseguimos nin una cosa, nin l'otra. La derrota ye xusta y nun me atrevería a poner denguna escusa. El primeru que m'equivoqué fui yo.

"Diximos-yos a los xugadores que había que igualar les disputes, y dempués cola calidá podíemos llevar el partíu. Pero nun-yos pillamos les sensaciones al partíu en nengún momentu".

El Real Oviedo recortaba distancies col 2-1, pero'l terceru pa los catalanes llegaba precisamente col goleador, Estanis, siendo atendíu fuera del terrén de xuegu. "Lo que pasó nel tercer gol ye de llamentu. El partíu nun se pierde por eso, pero dan-y una patada y lesiona un xugador tuyu. Vas perdiendo, polo tanto nun queremos perder tiempu. Pasa un minutu quince segundos y nun-y dexen salir y lleves el gol. Dicho eso, nun perdimos el partíu por eso. Perdímoslu porque nun igualamos les sos disputes".

L'entrenador carbayón reiteraba'l so enfotu pola derrota, "poles formes. Nun fuimos nós. Y eso a mi fáime más dañu".

Preguntáu pol derbi de la selmana que vien afirmaba "reactivaremos dende yá".