El Real Oviedo afrontó esti miércoles un nuevu amistosu de la so pretemporada y enfrentóse a la SD Ponferradina na XXXVI edición del Troféu Villa de Grau. Pa esta ocasión, el técnicu azul, Julián Calero, alineó un once con dellos cambios con respeutu al choque ante'l Depor y que foi formáu por: Miguel Narváez, Aisar, Marco Esteban, Dani Calvo, Samu, Aldasoro, Enzo Pérez, Villahermosa, Diego Menéndez, Jacobo González y Işfan.

Entamó bien l'alcuentru pa los azules que dende'l principiu impunxeron el so xuegu. Nel 17', Aldasoro punxo'l primeru con un gran golpiu dende la frontal ante'l que nada pudo facer Alvin. La superioridá carbayona yera notable y xusto enantes d'algamar la media hora d'alcuentru llegó'l segundu. Cabezazu de Marco Esteban a la salida d'un corner y 2-0. 

Un disparu dende fuera del área cerca del descansu supunxo la más clara pa la SD Ponferradina. Sicasí, un seguru Narváez atrapó ensin problemes l'esféricu con una gran intervención. Descansu.

Dempués de la reanudación, Calero modificó l'once y dio entrada a Aarón Escandell, Eze, Costas, Reina, Youness, Pablo Sáenz y Joaquín. Namái Samu, Aisar, Villahermosa y Jacobo siguíen sobre'l verde. Precisamente fueron estos dos últimos xugadores los artífices del terceru. Gran asistencia de Villahermosa pa dexar solu a Jacobo que nun perdonó a puerta vacía dempués de la salida fallida del guardameta. 

Col partíu yá vistu pa sentencia, Agudín, Nacho Vidal y Cardero entraron al terrén de xuegu pa disputar los últimos minutos d'un partíu al que entá-y faltaba un cuartu gol. Yá na recta final, Pablo Sáenz tuvo cerca de marcar un golazu pero'l so disparu marchó al palu. El que nun falló foi Eze que con un testarazu materializó'l centru d'Agudín y punxo'l cuartu y definitivu pa zarrar la goleada azul en Grau.