El Real Oviedo afrontó esti domingu una nueva cita de LALIGA Hypermotion visitando, por primera vez na so hestoria, a la AD Ceuta FC. El alcuentru, correspondiente a la décima xornada del campeonatu y que entamó a les 14:00 hores nel Estadiu Alfonso Murube, supunxo amás el partíu númberu 1.500 del conxuntu de la capital del Principáu en Segunda División. Una cita especial na que los azules tán acompañaos por mediu centenar d’aficionaos oviedistes desplazaos hasta tierres ceutíes.

Enantes del pitíu inicial guardóse un respetuosu minutu de silenciu en memoria d’un aficionáu y un exdirectivu de la AD Ceuta FC.

Pa esti compromisu, Julián Calero apostó por repetir el mesmu once que yera llográu la victoria frente a la SD Eibar nel Carlos Tartiere. Aarón Escandell ocupó la portería, con Samu Rodríguez y David Jiménez nos llaos y Carlos Domínguez y Dani Calvo, que algamaba los 200 partíos oficiales defendiendo la camiseta del Real Oviedo, nel eixe de la zaga. Alberto Reina, Youness y Aldasoro formaron el centru del campu, ente que Enzo Pérez y Goti ocuparon les bandes, con Víctor Mingo como referencia ofensiva. El alcuentru supunxo, amás, el regresu a Ceuta de Youness y Alberto Reina, asina como d’Aisar, que finalmente nun pudo entrar na convocatoria por una indisposición.

Dende’l principiu, el Real Oviedo amosó la so intención d’asumir el protagonismu del alcuentru. Los de Julián Calero fixéronse col control del balón, buscaron instalarse en campu contrariu y trataron de superar les llinies del conxuntu caballa mediante asociaciones y tresiciones rapides. Frutu d’esi bon entamu llegó la primer ocasión clara del partíu. Nel minutu seis, tres una serie de rechaces dientro del área, el balón cayó a los pies de Víctor Mingo, que buscó superar a Pedro López con un disparu axustáu. Sicasí, el guardameta local respondió con una gran intervención pa desviar l’esféricu a saqué d’esquina y evitar el primer tantu azul.

Col pasu de los minutos, la AD Ceuta FC trató de dar un pasu alantre y discutí-y la posesión al conxuntu oviedista, anque ensin consiguir xenerar peligru sobre la portería defendida por Aarón Escandell. Los azules continuaron buscando espacios en campu rival y la so insistencia provocó dos cartulines amarilles prácticamente consecutives pal cuadru local. Petxarroman, nel minutu 20, y Marino, nel 21, foron amonestaos tres sendes aiciones nes inmediaciones de la so área.

Precisamente de la segunda d’eses infracciones nació’l primer gol del alcuentru. Nel minutu 22, el Real Oviedo executó una falta dende’l llau del área con un unviu atrás hacia la frontal, onde apaeció Samu Rodríguez pa conectar un potente disparu que superó a Pedro López y punxo’l 0-1 nel marcador del Alfonso Murube.

Llueñe de conformase cola ventaxa, el conxuntu de Julián Calero continuó buscando la portería rival. Tres una cartulina amarilla a David Jiménez nel minutu 24, los azules volvieron a aproximase con peligru apenas un minutu dempués. Una bona aición colectiva por banda, entamada por Samu Rodríguez, finó col balón dientro del área y un remate de Goti que a puntu estuvo de convertise nel segundu tantu oviedista. L’atacante cayó tres el disparu, obstaculizáu por un futbolista local, nuna aición na que los xugadores azules reclamaron penalti, anque’l colexáu dexó siguir el xuegu.

A partir d’ehí, dambos conxuntos alternaron fases de posesión, si bien foi’l Real Oviedo el que siguió amosando una mayor intención ofensiva. L’equipu carbayón mantúvose firme en llabores defensives, zarrando los espacios y impidiendo que’l Ceuta progresase con comodidá más allá de los tres cuartos de campu.

Nel minutu 42, Escobar vio una nueva tarjeta amarilla pal conxuntu local. Yá nel tramu final del primer periodu, el xuegu estuvo marcáu poles disputes ente dambos equipos, con un choque ente Samu Rodríguez y Sevikyan que obligó a intervenir a los servicios médicos de los dos conxuntos pa atender a dambos futbolistes.

Ensin nueves ocasiones de peligru, l’alcuentru algamó’l tiempu de descansu col Real Oviedo por delantre nel marcador gracies al tantu de Samu Rodríguez, culminando asina una primer metá seria, y con personalidá por parte de los de Julián Calero.

Tres el pasu por vestiarios, Julián Calero caltuvo sobre’l céspede a los mesmos once futbolistes que yeren entamaos l’alcuentru, ente que’l conxuntu local introduxo la so primer modificación cola entrada de Redru en sustitución de Petxarroman.

La segunda metá entamó con una AD Ceuta FC que, obliga pola marcador, dio un pasu alantre y entamó a acercase con mayor frecuencia a los dominios d’Aarón Escandell. Nel minutu 52, el colexáu señaló penalti a favor de los locales tres una cayida de Koné dientro del área nuna aición con David Jiménez. Sicasí, tres ser avisáu y revisar la xugada nel VAR, l’árbitru rectificó la so decisión inicial y anuló la pena máxima.

El conxuntu caballa continuó insistiendo y, cuatro minutos dempués, Aarón Escandell tuvo que intervenir con una gran parada ante un disparu dende l’interior del área pa caltener la ventaxa oviedista. Nel 58, Julián Calero movió por primer vegada’l banquillu dando entrada a Morales, Pablo Sáenz y Nacho Vidal en sustitución de Víctor Mingo, Alberto Reina y David Jiménez.

Los cambios nun tardaron en dar los sos frutos. Nel minutu 60, una falta executada por Goti dende les inmediaciones de la llinia de fondu atopó a Morales nel segundu palu. El delanteru remató col pechu, Pedro López consiguió detener el balón y, atentu al rechazu, Carlos Domínguez apaeció pa unvialu al fondu de la rede y establecer el 0-2 nel Alfonso Murube.

Llueñe de conformase cola ventaxa, el Real Oviedo siguió buscando ampliar diferencies. Apenas dos minutos dempués, una bona internada de Nacho Vidal por banda finó con un unviu al corazón del área que Morales estuvo cerca de convertir nel tercer tantu de la tarde. Enzo Pérez, el mesmu Nacho Vidal y Samu Rodríguez tamién probaron fortuna nos siguientes compases, nun tramu nel que los azules atoparon espacios pa facer dañu a la defensa local.

Nel minutu 70, el Ceuta introduxo a Camacho y Sadik por Sevikyan y Koné, ente que tres minutos más tarde Julián Calero dio entrada a Jacobo pa refrescar l’ataque oviedista.

Col pasu de los minutos, el conxuntu local volvió a volcase sobre campu contrariu en busca d’un gol que-y permitiera metese de nuevu nel partíu. El Real Oviedo, pola so parte, trató d’aprovechar los espacios que dexaba’l cuadru caballa nel so intentu por recortar distancies, buscando sentenciar l’alcuentru mediante tresiciones rapides.

La insistencia del Ceuta atopó premiu nel minutu 83. Tres una sucesión de tres saques d’esquina consecutivos, los locales aprovecharon una serie de rechaces dientro del área pa unviar el balón al fondu de la portería y establecer l’1-2, apretando asina’l marcador de cara a los últimos minutos.

El tantu dio ales al conxuntu ceutín, que, espoleáu pola so afición, intensificó la so presencia en campu rival en busca del empat. Zalazar vio la cartulina amarilla nel minutu 90 y el colexáu decretó siete minutos de tiempu amestáu, nos que’l Real Oviedo tuvo que emplease a fondu pa defender la so ventaxa. Mientres’l descuentu tamién foron amonestaos Aritz Aldasoro y Carlos Domínguez, que vio la so quinta tarjeta amarilla y va perder el próximu compromisu lligueru por acumulación d’amonestaciones.

Pese al empuje final de los locales, los homes de Julián Calero supieron resistir y caltener el resultáu hasta’l pitíu definitivu, certificando una trabayada victoria a domiciliu que permite que los tres puntos viaxen de regresu a Asturies.

El Real Oviedo suma asina un nuevu trunfu en LALIGA Hypermotion, el segundu consecutivu tres la victoria frente a la SD Eibar, y yá pon la mirada nel so próximu compromisu lligueru, nel que va volver xugar llueñe del Carlos Tartiere pa enfrentase a la UD Almería.