Esta nueche comparecía l'entrenador del Real Oviedo, tres l'empat ensin goles ante'l Granada na primer xornada de LaLiga Hypermotion. Calero facía un análisis de lo asocedío nel terrén de xuegu: "Fiximos una bona primer parte, en xeneral hai más coses bones que males pero esto va de ganar. Na segunda costónos más, pero tamos na xornada 1".

El técnicu madrilanu ponía en valor los primeros 45 minutos: "La primer parte paecióse al Oviedo que me prestaría. La victoria hubiera sido xusta. Nun pueo tar contentu porque a mí préstame ganar, pero tengo que ser sensatu, vi al mio equipu lluchar y querer y con ellos al fin del mundu".

Sobre'l debú d'Enzo señalaba: "El rapaz tuvo bien y nun yera cenciellu entrar al partíu, nun-y quema'l balón y tenemos que dir con él con paciencia. Los rapazos necesiten el so tiempu de cocción y dir madurando pero tamos contentos".

Pa finar Calero sentenciaba: "La Segunda División saludónos y díxonos que esto va ser complicáu, pero eso yá lo sabíemos. Hubiera sido guapu celebrar la victoria cola nuestra xente, pero esto acaba d'entamar".