Tal día como güei, un 18 d'agostu, nel añu 1971, constituyíase oficialmente la Federación Asturiana de Peñes Azules (FAPA), colectivu xurdíu pa canalizar el sofitu popular al Real Oviedo.

Aquel día, a les 20:30 xuntáronse nel Mesón Feudal, asitiáu na cai de Cuadonga, n'Uviéu, Manuel García Rodríguez, como fundador y promotor de la FAPA, Emilio Peñarroya Corrales, Ángel Alonso Fernández, Manuel Álvarez Menéndez, José Luis Barcia, Javier Chércoles, Ángel del Valle González, Juan Luis González Castaño, Alfonso Pérez Berrocal, Gonzalo Luis López, Saturnino Escobedo Álvarez, Manuel Menéndez, Alejandro González Lamuño, José Manuel Rubio y Ángel García Fernández pa aprobar los estatutos de la nueva entidá y rubricar el so acta constitucional. 

Unos meses enantes, concretamente'l 29 de mayu de 1971, a la salida del partíu Real Oviedo-Betis, debido a la mala situación clasificatoria del conxuntu asturianu, un pequeñu grupu d'aficionaos repartiera una carta pa promover el sofitu al equipu al traviés d'un movimientu peñísticu.

Dicha carta taba firmada por siete oviedistes de corazón: Enrique Miranda Blanco, Benjamín García García, Emilio Peñarroya Corrales, Manuel Menéndez Álvarez, Ángel Alonso Fernández, Segundo Rodríguez Menéndez y Saturnino Escobedo Álvarez.

Díes dempués, el 13 de xunu, la FAPA tuvo presente por primer vegada nun partíu del Real Oviedo. Ese día l'equipu carbayón disputaba nel estadiu Carlos Tartiere'l partíu d'ida d'una eliminatoria contra'l Palencia. En xuegu, un puestu en Segunda División pa'l vencedor. El perdedor xugaría en Tercera na temporada siguiente.

El Real Oviedo finara'l Campeonatu Nacional de Lliga de Segunda División nel decimocuartu puestu y tocó-y enfrentase al Palencia, que se clasificara nes primeres posiciones de Tercera.

El alcuentru frente'l Palencia disputáu aquel 13 de xunu de 1971 ganólu'l Real Oviedo por 2-0. Nel partíu de vuelta, en tierres castellanes, l'equipu asturianu volvió vencer; impúsose por 1-2.

Nel partíu de vuelta'l Real Oviedo cuntó con un ampliu sofitu, yá que'l movimientu peñísticu desplazó hasta la capital palentina numerosos aficionaos, como los que se ven ondeando una bandera del so equipu nel terrén de xuegu na foto que ilustra esti testu.