L'entrenador del Real Oviedo, Raúl González, compareció esti vienres na sala de prensa del Carlos Tartiere na previa del so estrenu como entrenador oviedista. El técnicu azul dirixirá mañana, sábadu, a les 21:00 hores, el so primer alcuentru al frente del conxuntu carbayón, nel compromisu que va medir a los de la capital del Principáu col Girona.

L'entrenador amosóse mui ilusionáu ante'l retu que supón asumir les riendes del equipu y destacó les bones sensaciones que-y transmitieron los sos primeros díes nel club. “Ye una gran responsabilidá pol club, pola institución, pola ciudá y polos afeccionaos, que tán a muerte col equipu”, señaló. Nesti sen, quiso poner en valor l'acoyida y l'ambientu de trabayu que atopó dende la so llegada: “Atopé un grupu fantásticu a nivel humanu y profesional pa poder trabayar con ellos”.

A pesar del escasu marxe de tiempu dende la so incorporación, Raúl González destacó la predisposición de la plantiya y de tolos trabayadores de la entidá. “Los guahes tán mui metíos, con ganes de facer les coses bien, de trabayar y d'esforzase”, esplicó, enantes de destacar que l'oxetivu ye construir un procesu de trabayu continuáu que permita al equipu llegar a cada xornada nes meyores condiciones pa competir.

“Queremos que la xente disfrute, que l'equipu tea con una identidá y que seya reconocible”, afirmó el técnicu, consciente de que pa algamar esi propósitu va ser necesario tiempu y trabayu diariu.

En rellación colos primeros entrenamientos, Raúl esplicó que la prioridá foi conocer a los futbolistes y entamar a tresmitir los sos plantegamientos, ensin perder de vista los aspeutos positivos que yá venía amosando l'equipu. La reciente victoria en Cádiz tamién supón un puntu de partida afayadizu pa afrontar esti primer compromisu.

“Hebo pocos díes, pero tampoco vamos modificar delles coses. Tamién vamos dar continuidá a otres polos pocos díes de trabayu”, comentó. L'entrenador destacó, amás, la bona sintonía que atopó col vestiariu, especialmente al traviés de les primeres conversaciones colos capitanes.

Preguntáu polos aspeutos que quier potenciar nel xuegu del Real Oviedo, el técnicu foi claro al definir delles de les sos principales señes d'identidá: “Tenemos claro lo que queremos del Real Oviedo, de lo que queremos de los xugadores, de cómo queremos atacar y de cómo queremos defender. Queremos ser un equipu mui presionante, mui vertical”.

Sicasí, insistió en que la implantación d'eses idees va ser progresiva. “Una cosa ye lo que ún quier y siente y otra cosa ye lo que va pasar mañana”, apuntó, añadiendo que les próximes selmanes van permitir trabayar con mayor fondura y detectar los aspeutos que necesiten meyorar.

Nesa llinia, tamién espresó el so deséu d'algamar un equipu “muncho más equilibrau, muncho más sólidu” y con una mayor constancia mientres los partíos. Pa ello, considera fundamentales el trabayu diariu, los hábitos y la cultura que se vaya implantando nel grupu.

L'alcuentru de mañana va tener un componente especial pal entrenador, que nun ocultó les sos ganes de vivir por primer vegada l'ambientu del Carlos Tartiere dende'l banquillu azul.

“Tóime mui ilusionáu, ye una gran responsabilidá y tóime feliz y contentu, con ganes de ver mañana'l estadíu con un gran ambientu, con lo que ye esti estadíu, cómo empuxa”, manifestó.

Raúl reconoció que'l debut soñáu siempre pasa por algamar una victoria, anque tamién quiso poner en valor l'esperiencia d'estrenase al frente del equipu nun escenariu como'l Tartiere y ante un rival d'entidá como'l Girona.

“Ojalá seya una victoria, que ye la que vamos a lluchar y la que sentimos”, afirmó. El técnicu espera que'l so equipu amose valentía, compromisu y determinación mientres los 90 minutos pa competir pol resultáu.

Asina mesmu, quiso tresmitir un mensaxe de tranquilidá y confianza a los sos futbolistes, destacando que'l cuerpu técnicu intentó ufiertar-yos ferramientes y indicaciones concretes nestios primeros díes. “Lo más importante ye que ellos tán tranquilos, tán confiados y que tengan la seguridá de que lo pueden facer bien”, señaló.

Por último, l'entrenador quiso destacar especialmente l'acoyida recibida por parte de les persones que formen parte del club. “Quedaría coles bones persones que hai trabayando nel club, coles ganes que tienen de trabayar y lo que quieren al so Real Oviedo”, indicó.

Raúl González tamién reconoció'l sofitu que ta recibiendo del so entornu personal y profesional nesta nueva etapa, con especial mención a la so familia y a les persones que lu acompañaron a lo llargo de la so trayeutoria nel fútbol.

Cola ilusión del estrenu y la responsabilidá d'afrontar un nuevu retu, el técnicu azul yá prepara'l so primer partíu al frente del Real Oviedo. Mañana, el Carlos Tartiere va ser l'escenariu d'un nuevu capítulu pal conxuntu oviedista, que va buscar ante'l Girona ufiertar a la so afición una primer amuesa de la identidá y el compromisu que'l so nuevu entrenador quier construir.