ROV / NOTICIES

Querer, pero nun poder

Un Real Oviedo, reponiéndose del tempraneru gol encaxáu, collecha un empate ente la Ponferradina, qu'acabó defendiendo'l puntu colos azules entornaos

Volver

27/03/2021 18:43

El NMR Carlos Tartiere foi l'escenariu d'una nueva xornada de competición, la 31ª para'l Real Oviedo, que recibió a la Ponferradina, nun partíu qu'acabó cola resultancia de 1-1 a la fin de los minutos reglamentarios.
Volvíen los de Ziganda a xugar como locales, dempués del empate collecháu na última xornada en casa  del líder, buscando sumar de tres para poner el broche final a una selmana cargada d'uvieísmu, coles acciones llevaes a cabu para conmemorar los 95 años d'hestoria de la entidá, y los azules buscáronlo hasta'l final, pero nun pudo ser.
Con un once formáu por Femenías; Juanjo Nieto, Arribas, Grippo, Mossa; Sangalli, Edgar, Tejera, Borja Sánchez; Borja Valle y Blanco Leschuk, onde'l llateral valencianu y l'estremu bercianu fueron les principales novedá na tarde de güei, los de la capital del Principáu empecipiaron un alcuentru que se-yos punxo en contra a los pocos minutos de xuegu, col tanto de la Ponferradina namás arrincar el primer actu. Tuvieron que remar los de Ziganda, que tres el gol tuvieron noquiaos, ensin tar cómodos sobre'l verde del feudu oviedista y col control del xuegu del llau visitante. Femenías con una gran mano evitó'l segundu pa los bercianos. La reacción del Real Oviedo viose llegáu l'ecuador del primer tiempu, cola recuperación de la pelota y la busca de transiciones de banda a banda, qu'abrieron buecos nes llínees de la Ponferradina. Borja Valle y Edgar punxeron los primeros avisos oviedistas, pero sería esti postreru'l qu'anotaría'l tanto del empate nel lluminosu. El catalán, al segundu palu, remató un balón puestu por Tejera énte'l que Caro nun pudo facer nada. Cola resultancia de 1-1 llegar al descansu.
Tres el pasu por vestuarios el partíu nivelóse, con dambos equipos lluchando de tu a tu, nuna segunda parte bien física y de contactu. Rodri y Christian Fernández entraron al terrén de xuegu en llugar de Blanco Leschuk y Arribas, esti postreru retiróse con problemes físicos que-y torgaron siguir. Una mano involuntaria de Christian Fernández na área, tres un rebote, fixo que Vicandi Garrido señalara la pena máxima para los del Bierzo, con revisión nel VAR incluyida, tres la que'l colexáu vascu anuló'l llanzamientu de los once metros en contra del Real Oviedo. Nos minutos finales, onde Obeng y Javi Mier entraron al terrén de xuegu, los de la capital del Principáu buscaron l'arcu defendíu con Caro, con delles ocasiones para poder desfacer les tables nel marcador, pero nun tuvieron l'aciertu de cara.
Repartida de puntos nel NMR Carlos Tartiere, onde'l Real Oviedo intentólo hasta'l final, cola sensación de que l'empate ente los bercianos sabe a poco. Nun hai tregua pal conxuntu oviedista, que dende mañana va trabayar  cola mirada puesta nel alcuentru d'esti martes énte'l Alcorcón.

ROV / J31 LaLiga SmartBank

  • Joan Femenias
  • Mossa
  • Arribas (63')
  • Grippo
  • Juanjo
  • Edgar González
  • Sangalli
  • Tejera (81')
  • Borja Sánchez
  • Borja Valle (81')
  • Blanco Leschuk (63')

Suplentes

  • Rodri (64')
  • Nahuel
  • Lucas
  • Viti
  • Samuel Obeng (82')
  • Johannesson
  • Gabriel Brazão
  • Carlos Hdez
  • Javier Mier (82')
  • Jimmy Suárez
  • Bolaño (64')
  • J. A. Caro
  • Paris Adot
  • Amo
  • Moisés
  • A. Castellano
  • Aguza (79')
  • Juergen Elitim (88')
  • Erik Morán (88')
  • Carlos Doncel (88')
  • P. Valcarce
  • D. Romera (66')

Suplentes

  • Gianfranco Gazzaniga
  • Alfredo Pedraza
  • Iván Rodríguez (89')
  • Álex Aizpuru (89')
  • Saúl Crespo (89')
  • Yuri (67')
  • Pablo Larrea (80')
  • Yacouba Magagi
  • Manu García
  • Alejandro Viedma

Estadiu

Carlos Tartiere

Goles

  • 0-1 (2'). Aguza
  • 1-1 (40'). Edgar González

Árbitru

Iñaki Vicandi Garrido amonestó aBorja Valle (67'), Edgar González (86') del Real Oviedo y Paris Adot (92') del SD Ponferradina.