El Club de Negocios del Real Oviedo by Unicaja dio'l pistoletazu de salida a la temporada 2026/27 con una primer xornada que reflexa l'espíritu y la vocación d'esta comunidá empresarial: xenerar rellaciones, compartir conocencia y crear nueves oportunidaes alredor del Real Oviedo.

La inauguración de la nueva temporada contó cola participación de Jesús Martínez, presidente del Grupu Pachuca, y Pedro Luis Fernández, presidente de GAM, quienes caltuvieron una conversación de máximu nivel en redol a dellos de los grandes retos y oportunidaes del mundu empresarial y deportivu. Lideralgu, crecimientu, internacionalización, visión de futuru y xestión foron dellos de los eixos d'un alcuentru plantegáu dende la cercanía y con una clara vocación d'utilidá pa les empreses que formen parte del Club.

La xornada permitió conocer de primer mano dos perspeutives empresariales complementaries y poner en valor la importancia de compartir esperiencies y xenerar conexones ente compañíes. Un diálogu que tresciende l'ámbitu deportivu pa convertir al Real Oviedo nun puntu d'alcuentru ente empresarios, profesionales y entidaes comprometes col crecimientu y el desarrollu d'Asturies.

El Club de Negocios del Real Oviedo by Unicaja naz y crez col oxetivu d'ir más allá de la rellación tradicional ente un club y los sos patrocinadores. Ye una comunidá empresarial activa, concebida pa favorecer el contautu ente les compañíes que acompañen al Real Oviedo, facilitar nueves rellaciones profesionales y propiciar sinerxes que puedan traducise en proyectos y oportunidaes de negociu.

Nesti sen, alcuentros como'l celebráu nesta primer xornada de la temporada permiten que los patrocinadores y empreses venceyaes al club se conozan, compartan intereses y atopen nuevos puntos de conexón, reforzando una rede empresarial que tien nel Real Oviedo un elementu común.

La presencia de Jesús Martínez y Pedro Luis Fernández na apertura de la temporada subraya amás la dimensión que'l Club de Negocios quier algamar: un espaciu de referencia pal diálogu empresarial, l'aprendizaxe y la xeneración d'oportunidaes, col deporte como puntu d'alcuentru.

Por último, la xornada concluyó con un momentu especialmente simbólicu pa tolos patrocinadores del Real Oviedo. Cada una de les empreses que formen parte del Club de Negocios recibió la camiseta oficial de la temporada 2026/27, como muestra del vínculu y compromisu que xune al club cola so comunidá empresarial. L'alcuentru zarróse con una foto de familia de tolos patrocinadores, poniendo'l broche a una xornada marcada pol diálogu, les conexones y les nueves oportunidaes xeneraes alredor del Real Oviedo.