Tal día como güei, un 23 de xunu, nel añu 1946, el defensa oviedista Jugo debutaba cola selección española absoluta, nun partíu contra Irlanda disputáu nel estadiu Metropolitano, en Madrid.

Juan Jugo Larrauri, nacíu en Galdácano (Vizcaya) el 15 de marzu de 1920 y conocíu nel mundu del fútbol pol so primer apellíu, incorporóse a la primer plantiya del Real Oviedo el 17 d'agostu de 1945, procedente del Sabadell. Xugaba de defensa y permaneció nel Real Oviedo mientres dos temporaes.

Aquel 23 de xunu del añu 1946 debutó cola selección española, cuxu once titular esi día foi'l siguiente: Eizaguirre, Jugo, Aparicio, Gonzalvo III, Ipiña, Huete, Iriondo, Panizo, Martín, César, Gaínza. L'única sustitución nel combináu español produjose a los 35 minutos de partíu, cuando Martín, lesionáu, foi remplazáu por Zarra. El seleccionador español yera Luis Casas Pasarín, quien años dempués sería entrenador del Real Oviedo en dos etapes diferentes. El partíu tenía calter amistosu y el so resultáu final foi 0-1.

Jugo foi'l sestu xugador que aportó'l Real Oviedo a la selección española absoluta, onde anteriormente debutaren Lángara, Galé, Herrerita, Soladrero y Emilín. Juan Jugo Larrauri finó en Zaragoza, a los 87 años d'edá, el día 13 d'ochobre de 2007.

La fotografía que ilustra esti testu amuesa a los xugadores de la selección española instantes enantes del so partíu contra Irlanda el 23 de xunu de 1946. Jugo apaez de pie, el primeru pela derecha.