El Real Oviedo sufrió una nueva derrota tres caer derrotáu por 2-3 ante la UD Las Palmas nel Carlos Tartiere, nel alcuentru correspondiente a la duodécima xornada del campionatu. Los azules, bien superaos mientres la primer metá, llegaron a vese con tres goles per debaxo nel marcador, pero protagonizaron una reacción nel tramu final que estuvo cerca de camudar el desenlaze del alcuentru. Sicasí, l’esfuerciu de los últimos minutos nun foi abondo pa rescatar un resultáu positivu.

El conxuntu canariu salió al céspede del Tartiere coles idees bien clares y enseguidina fíxose col control del partíu. Les Palmas dominó la posesión, alcontró espacios y consiguió imponer el so ritmu ante un Real Oviedo que nun acababa d’atopase sobre’l terrén de xuegu. Los visitantes aprovecharon el so gran momentu pa anotar hasta en dos ocasiones y dir al descansu 0-2 a favor.

Tres la reanudación, el míster Julián Calero decidió mover el banquillu con un triple cambiu en busca d’una reacción inmediata. Estanis, Morales y Jacobo saltaron al terrén de xuegu en sustitución de Mingo, Nacho Vidal y Aldasoro, nun intentu d’aportar nueves soluciones y camudar la dinámica d’un partíu que se pusiera bien complicáu.

Sicasí, el primer golpe de la segunda metá volvió llevar la firma del conxuntu visitante. Les Palmas alcontró otra vuelta’l camín del gol y estableció’l 0-3, dexando al Real Oviedo ante una montaña bien difícil d’escalar.

A pesar del duru escenariu, los azules nun baxaron los brazos. Nel minutu 62, el conxuntu carbayón alcontró’l premiu a la so insistencia col tantu de Carlos Domínguez, que punxo’l 1-3 nel marcador y dio un nuevu impulsu al equipu y a la grada del Carlos Tartiere. Dende esi momentu, l’alcuentru camudó. L’Oviedo dio un pasu alantre, entamó a acumular llegaes y llanzóse decididamente en busca d’una remontada que, hasta entós, paecía bien llonxana. Les Palmas, pola so parte, reculó pa protexer la so ventaxa y intentó zarrar los espacios ante l’empuje de los locales.

Los azules alcontraron entós los sos meyores minutos del alcuentru. Con más intensidá, presencia ofensiva y determinación, entamaron a xenerar peligru y a creer nes sos posibilidaes. El Tartiere tamién empuxó, consciente de que l’equipu taba alcontrando por fin el camín pa metese de llenu nel partíu.

La reacción oviedista tuvo la so continuidá nel minutu 82, cuando Goti firmó un auténticu golazu de falta pa establecer el 2-3. Un llanzamientu espectacular que redució la distancia a un solu tantu y devolvió tola emoción al alcuentru nos últimos compases. Col marcador tan axustáu, el Real Oviedo volcóse en busca del empaté y tuvo ocasiones pa firmar el 3-3 anque’l resultáu nun camudó.

El tropezón supón un nuevu golpe pa los carbayones, que encadenen otra derrota dempués de la sufrida’l pasáu xueves na Copa del Rei frente al Numancia.