El Real Oviedo llogró esti sábadu una importante victoria por 1-2 ante'l Cádiz CF na so visita al JP Financial Estadio, nun alcuentru competíu que supo encarrilar nuna gran primer metá y xestionar dempués con oficiu y personalidá. Los tantos d'Estanis y Ilyas Chaira, dambos enantes del descansu, foron decisivos pa que los carbayones sumaren tres puntos d'enorme valor y punxeren fin a la dinámica negativa tres les derrotes ante'l CD Numancia, en Copa del Rei, y la UD Les Palmes, el pasáu llunes nel Carlos Tartiere.

Pa la cita en tierres gaditanes, Calero introduxo delles novedaes nel once inicial. Estanis, Ilyas Chaira y Isfan foron dalgunes de les principales apuestes, xunto a David Jiménez, que ocupó'l llateral derechu. Un equipu renováu que saltó al terrén de xuegu con personalidá y que enforma alcontró recompensa a la so propuesta. Enantes del pitíu inicial, dambos conxuntos homenaxearon la figura de Jesús de Miguel con un emotivu minutu de silenciu, al igual que nel minutu 9 de partíu en honor al so dorsal.

El Real Oviedo entamó dominando, faciendo cola posesión y tentando llevar la iniciativa del partíu. Ese bon entamu tuvo premiu col primer tanto de la tarde. Estanis aprovechó un fallu d'Ezkieta na finalización d'una acción pa adelantar al conxuntu azul y poner el 0-1 nel marcador. Un gol que permitió a los oviedistes xugar con mayor tranquilidá, ensin renunciar al control del partíu.

Con ventaxa nel marcador, los de Calero supieron caltener l'orde y contener los intentos d'un Cádiz que nun alcontraba abondes víes pa inquiedar la portería azul. L'Oviedo amosóse sólidu y esperó la so oportunidá pa volver a golpiar. Y esta llegó xusto enantes del descansu, con una acción d'enorme calidá de Chaira. El futbolista azul recibió y conectó un zurdazu espectacular, imparable pa'l meta del Cádiz CF, que significó'l 0-2. Un auténticu golazu pa redondear una gran primer parte y, amás, nuna tarde especial pal '7', que tornaba a la titularidá dempués de superar la so llarga lesión.

La nota negativa de los primeros 45 minutos llegó cola lesión de Dani Calvo. El central tuvo que abandonar el terrén de xuegu en camilla dempués d'una acción desafortunada al tentar cortar una contra del Cádiz. Costas foi'l encargáu de sustituyilu.

Tres el pasu per vestuarios, el Cádiz dio un pasu alantre y tentó metese otra vuelta nel partíu. El Real Oviedo, pola so parte, caltuvo la concentración y foi adaptándose a les necesidaes del partíu. Col pasu de los minutos, Calero movió'l banquillu y realizó un triple cambiu, dando entrada a Pablo Sáenz, Jacobo y Reina pa aportar frescura al equipu nel tramu decisivu.

El conxuntu local apretó en busca de recortar distancies y alcontró premiu nel minutu 82, cuando Izeta llogró'l 1-2. El tanto dio emoción a los últimos compases del partíu y obligó al Oviedo a emplegase a fondu pa defender una ventaxa que tanto trabayu costara llograr.

Llueñe de venir abaxo, los azules supieron xestionar los minutos finales, caltener la concentración y resistir los últimos intentos del Cádiz. Incluso tuvieron la oportunidá de sentenciar definitivamente'l choque con una espectacular falta de Jacobo que finó estampándose nel traveseru. Una acción que estuvo bien cerca de convertise nel tercer tanto oviedista.

Finalmente, el marcador yá nun se movió y el Real Oviedo pudo celebrar una victoria d'enorme importancia. Tres puntos que permiten recuperar sensaciones, reforzar la confianza del grupu y romper una mala racha nun escenariu esixente.