Tal día como güei, un 2 de xunu, nel añu 1958, l'oviedismu celebraba l'ascensu del so equipu a Primera División, certificáu frente al Rayo Vallecano en Madrid el día anterior.

El Real Oviedo debía vencer nel feudu del Rayo Vallecano pa llograr l'ascensu. Impúxose por 0-2. Ese día la alienación del equipu asturianu, entrenáu por Abel Picabea, foi la siguiente: Caldentey, Toni, Alarcón, Marigil, Sánchez, Ferrer, Cuervo, Xirau, Aloy, Artabe, Chus Herrera. Los dos goles del partíu foron marcaos por Sánchez y Aloy.

El equipu tornó al día siguiente a Uviéu, onde foi recibíu por decenes de miles d'aficionaos que salieron a la cai pa festexar l'ascensu. Aclamaos pola multitú, xugadores, entrenador, directivos y demás integrantes del club dirixéronse al Conceyu d'Uviéu. Ellí foron homenaxeaos pola corporación municipal.

La fotografía que ilustra esti testu amuesa a dellos futbolistes del Real Oviedo celebrando aquel ascensu llográu en 1958 nel estadiu del Rayo Vallecano. D'esquierda a derecha apaecen Xirau, Cuervo, Artabe, Ferrer y Aloy.