Tal día como güei, un 29 de setiembre, nel añu 1935, el Real Oviedo marcaba-y al Real Club Deportivo de La Coruña cinco goles, conxuntu de tantos que la afición oviedista yera bautizáu col nome de jorobu pocos años enantes.

Dicha goleada llogróla'l Real Oviedo nun partíu disputáu nel estadiu coruñés de Riazor y correspondiente al Campeonatu Superrexonal Galicia-Asturies, competición que yera entamada la temporada anterior en sustitución del Campeonatu Rexonal d'Asturies.

L'entrenador del Real Oviedo, José María Peña, alineó pa afrontar esi alcuentru a los siguientes once xugadores: Florenza, Calichi, Pena, Sirio, Soladrero, Chus, Casuco, Herrerita, Lángara, Felipe, Emilín.

Al descansu llegóse col resultáu de 0-2, con un gol marcáu por Lángara y otru llográu por Herrerita. Na segunda parte, Herrerita marcaría otros dos tantos y Lángara facería otru más. El choque remató col contundente resultáu de 0-5.

El Real Oviedo proclamaríase campeón de la competición, na que l'Unión Sporting Club de Vigo alzaríase col subcampeonatu. Tamién participaron nel Campeonatu Superrexonal Galicia-Asturies el Sporting de Xixón, el Real Club Celta de Vigo y el Real Stadium Avilesín, amás del yá mentáu Real Club Deportivo de La Coruña.

La fotografía que ilustra esti testu amuesa a Herrerita, autor de tres de los goles d'aquel alcuentru nel que'l Real Oviedo impúnxose al Deportivo de La Coruña el 29 de setiembre de 1935.