Tal día como güei, un 9 de xunu, nel añu 1991, el Real Oviedo derrotaba al Castellón nel Carlos Tartiere y finaba en sexta posición de la tabla clasificatoria de Primera División, lo que-y proporcionaría al equipu carbayón el derechu a disputar la Copa de la UEFA.

La certificación del pase del Real Oviedo a la Copa de la UEFA produciríase unos díes dempués, cuando l'Atlético de Madrid vencía al Mallorca na final de la Copa del Rei, lo cual significaba que l'equipu clasificáu nel sestu puestu de Primera División llograba'l derechu a xugar la competición europea.

Enfrente al Castellón, n'aquel alcuentru de xunu de 1991, correspondiente a la última xornada de Lliga de la temporada 1990-91, l'entrenador del Real Oviedo, Javier Irureta, alineró inicialmente el siguiente once: Viti, Gaspar, Gorriarán, Jerkan, Sañudo, Rivas, Berto, Elcacho, Gračan, Carlos, Sarriugarte. Nel minutu 80, Gaspar yera sustituyíu por Paco, y nel minutu 85, Julià remplazaba a Carlos.

A los 5 minutos d'alcuentru, Carlos marcó'l primer gol del choque. Ese tantu foi'l númberu 1200 de los llograos pol Real Oviedo en Primera División. El 2-0 foi obra de Berto nel minutu 57. Rivas llogró'l tercer tantu del conxuntu ovetense, nel minutu 65. Con esi resultáu de 3-0 llegóse al final del partíu.

Na fotografía que ilustra esti testu vese al delantere Carlos, autor del que foi primer gol del partíu y milésimu ducentésimu tantu del Real Oviedo en Primera División.