El Real Uviéu llegó a un alcuerdu pa facese colos servicios del atacante Yaw Yeboah, en calidá de cedíu, dende’l Manchester City.
El xugador, de 20 años d’edá, nació’l 27 de marzu de 1997 en Ghana. Nel 2014 fichólu’l Manchester City, que lu cedió nes dos últimes temporaes al conxuntu de Primer División francés LOSC Lille, y al Twente, de la Primer División holandesa.
El xugador completó un total de 26 partíos como titular la temporada pasada, na qu’anotó dos goles na máxima categoría holandesa. Internacional con Ghana dos veces, Yeboah disputó un total de diez partíos col combináu Sub-20, anotando cinco goles.
Yaw Yeboah ye un xugador mui mozu que destaca pola so habilidá, rapidez y calidá.
El futbolista va incorporase la selmana que vien a los entrenamientos y va trabayar a les órdenes de Juan Antonio Anquela.
Trayectoria:
(2014) Manchester City FC
(2015/16) LOSC Lillle
(2016/17) FC Twente
La presentación oficial de Yeboah como xugador nuevu del Real Uviéu va facese nos díes vinientes.
El xugador nun va facer declaraciones hasta’l momentu de la so presentación oficial.
