Esta mañana comparecía en rueda de prensa l'entrenador del Real Oviedo, Guillermo Almada, pa atender a los medios presentes na ciudá deportiva enantes de viaxar a Madrid pa enfrentase al Rayo Vallecano.
Tres la primer pregunta, l'entrenador azul amosábase contundente, "ratificar too lo bonu que tamos faciendo, ye una final, el partíu más importante del añu y asina tenemos que enfrentalu".
Sobre'l partíu pasáu contra l'Atleti señalaba, "ye duru facer tantes coses bones y nun quedar col trunfu, pero si seguimos asina la lóxica ye que los resultaos positivos tienen de venir".
Esti miércoles l'equipu enfréntase al Rayo, un alcuentru envolvín en polémica pola discutida suspensión. "Namás pensamos nel partíu, en nós y en tratar de ganar. Too lo que arrodió'l partíu nun depende de nós, anque sí te da rebeldía. Ún nun xugará peor o meyor poles circunstancies que arrodioron el partíu".
La polémica que arrodió l'estáu del céspede tamién foi motivu de pregunta. "Nós tenemos que imponer el nuesu xuegu con independencia de cómo tea la cancha porque tará pa los dos igual y tratar de sumar los tres puntos".
Ante la insistencia de les preguntes sobre la polémica que arrodia'l partíu d'esti miércoles, l'uruguayu declaraba finalmente: "Nunca me pasó dalgo asina, que se suspendiera dos hores enantes, que se camudara'l campu na selmana del partíu... nun son midíes d'una lliga organizada, pero les decisiones nun dependen de nós. Creo que nos habríen de dar los tres puntos, pero tenemos que focalizar nel rival, caltener lo bonu que tamos faciendo y traer los tres puntos".