El Real Uviéu llegó a un alcuerdu pa facese colos servicios del defensa José María Angresola Jiménez, "Mossa", pa les dos temporaes vinientes.
El xugador, de 28 años d'edá, nació'l 24 de xineru de 1989 n'El Puig, Valencia. Formáu nes categoríes inferiores del UD Levante, onde debutó en Segunda División, na temporada 2008-09, la trayectoria de Mossa desenvolvióse sobre manera nes files del conxuntu levantinista, siendo capitán del filial azulgrana na campaña 2013/14. Tamién tuvo un pasu curtiu pel Valencia Mestalla, na campaña anterior.
Nel 2014, Mossa incorporóse a les files del Nàstic de Tarragona, col que llogró l'ascensu a Segunda División. El futbolista lleva un total de 77 partíos xugaos nes postreres dos campañes en LaLiga 123 nel conxuntu catalán, xugando play off d'ascensu a Primer División na 2015-16.
Mossa ye un llateral esquierdu que tamién pue actuar como central, bien completu, que destaca pol so bon nivel defensivu, velocidá y percorríu pela banda esquierda.
El futbolista va incorporase nel intre a los entrenamientos, depués de sometese esta mañana a reconocimientu médicu na Clínica Asturias, y va trabayar a les órdenes de Juan Antonio Anquela na sesión d'esta tarde pa tar a disposición dafechu del técnicu de la qu'empiece la temporada.
Trayectoria:
(2008/09) Levante UD B
(2009/11) Levante UD
(2012) Valencia Mestalla
(2012-14) Levante UD B
(2014/17) Nástic de Tarragona
La presentación oficial de Mossa como xugador nuevu del Real Uviéu va facese güei a les 17 h nel Carlos Tartiere.
El xugador nun va facer declaraciones hasta'l momentu de la so presentación oficial.
AST
