La dirección deportiva del Real Uviéu concretó los primeros partíos amistosos de la pretemporada 17-18.
La primer plantiya carbayona, que va empezar los entrenamientos el día 10 de xunetu nes instalaciones deportives d’El Requexón, yá conoz el calendariu provisional de partíos amistosos pa esta pretemporada a falta de dalgún alcuentru más por concretar. Nes selmanes de trabayu preparatoriu que va llevar alantre l’equipu, los responsables de la estaya deportiva organizaron un calendariu onde encaxaríen ente ocho y nueve partíos de pretemporada.
Como vien siendo vezu nes últimes temporaes, el conxuntu uviedista va empezar enfrentándose, el 15 de xunetu, al Real Uviéu Vetusta n’El Requexón. Cuatro díes más tarde, el día 1, el Real Uviéu va midise col CD Lealtad en Les Caleyes. La tercer selmana de pretemporada va volver dexanos dos enfrentamientos preparatorios más. El día 26 de xunetu, el Real Uviéu va disputar otru alcuentru frente a la SD Ponferradina, n’El Toralín, mentes que’l 29 de xunetu va facer lo mesmo visitando a la Cultural Leonesa nel Reino de León.
A primeros d’agostu, el día 3, el conxuntu uviedista va recibir nel Carlos Tartiere al Deportivo de La Coruña. Depués, la espedición uviedista va viaxar hasta Torrelavega pa enfrentase a la SD Eibar, el día 5 d’agostu, n’El Malecón.
D’esta manera, los nueve partíos amistosos afitaos hasta la fecha son estos:
*Real Uviéu – Real Uviéu Vetusta*
Sábadu 15 de xunetu, hora por determinar. Instalaciones deportives d’El Requexón.
*CD Lealtad – Real Uviéu*
Miércoles 19 de xunetu, hora por confirmar. Campu municipal de Les Caleyes (Villaviciosa).
*SD Ponferradina – Real Uviéu*
Miércoles 26 de xunetu, hora por confirmar. El Toralín.
*Cultural y Deportiva Leonesa – Real Uviéu*
Sábadu 29 de xunetu, a les 20:30 hores. Estadiu Reino de León.
*Real Uviéu - Real Club Deportivo de la Coruña*
Xueves 3 d’agostu, a les 20:30 hores. Estadiu Carlos Tartiere.
*SD Eibar – Real Uviéu*
Sábadu 5 d’agostu,a les 19:00 hores. Campu d’El Malecón (Torrelavega).
Amás de los partíos concretaos, el Real Uviéu tien previsto xugar un alcuentru’l día 22 de xunetu. L’horariu, el sitiu y el rival tán pendientes de confirmación. Otra manera, la dirección deportiva sigue trabayando pa zarrar polo menos un alcuentru preparatoriu más n’agostu, sobre manera de cara a la postrer selmana previa al arranque lligueru.
