El Real Uviéu llegó a un alcuerdu pa facese colos servicios del atacante Aarón Ñíguez Esclápez, “Aarón”, pa les dos temporaes vinientes.
El xugador, de 28 años d’edá, nació’l 26 de abril de 1989 n’Elche. Aarón tien una esperiencia dilatada nel fútbol profesional depués del so pasu per Valencia, Xerez, Iraklis de Tesalónica, Rangers, Celta de Vigo, Recreativo de Huelva, Almería, Elche, Sporting de Braga y Tenerife, equipu del que llega procedente, nuna temporada na que disputó 36 partíos, axuntando 2.268 minutos y anotando cuatro goles, amás de disputar la final del play off d’ascensu a Primer División.
Aarón ye un estremu de 1,70 metros, que destaca pola so calidá, habilidá col balón, bon golpéu a puerta, amás del so aciertu de cara a gol. La trayectoria deportiva del ilicitanu empezó na cantera del Valencia, col que llegó a debutar en Champions League na temporada 2006/07 frente a la Roma. Col Elche, Aarón diba xugar un total de 43 partidos en Primer División, anotando dos goles nes dos campañes que militó nel conxuntu franxiverde. Amás, l’estremu formó parte de les categoríes inferiores de la Selección Nacional, siendo internacional sub-21 cuatro veces.
L’ilicitanu va empezar la pretemporada col Real Uviéu’l día 17 de xunetu, depués d’acabar la temporada va malpenes unos díes, disputando la final del play off d’ascensu a Primer División col Tenerife. Depués de sometese y superar los reconocimientos médicos pertinentes, Aarón va incorporase a la disciplina del primer equipu uviedista, y va trabayar a les órdenes de Juan Antonio Anquela pa tar a disposición dafechu del técnicu de la qu’empiece la temporada.
Trayectoria:
(2006/07) Valencia CF
(2007) Xerez Club Deportivo
(2008) Iraklis Tesalónica FC
(2008/09) Rangers FC
(2009/10) Celta de Vigo
(2010/11) Recreativo de Huelva
(2011/13) UD Almería
(2013/15) Elche Club de Fútbol
(2015/16) Sporting de Braga
(2016/17) Club Deportivo Tenerife
La presentación oficial d’Aarón Ñíguez como xugador nuevu del Real Uviéu va facese desque llegue a Uviéu y se someta al reconocimientu médicu pertinente na Clínica Asturias.
L’estremu nun va facer declaraciones hasta’l momentu de la so presentación oficial.
