La temporada 2025/26 va quedar marcada na hestoria de les categoríes inferiores del Real Oviedo. El trabayu, la dedicación y el compromisu de tolos integrantes de la cantera azul llevaron al Club a vivir un cursu estraordinariu, con unos resultaos que reflexen el gran momentu que traviesa la estructura formativa oviedista.

Dende los más pequeños hasta los equipos de mayor categoría, prácticamente la totalidá de los conxuntos de la cantera llograron proclamase campeones de les sos respectives lligues territoriales. Un dominiu que evidencia la fortaleza del proyectu de cantera y la calidá del trabayu realizáu a lo llargo de tola temporada.

Los equipos de categoría Prebenxamín, Benxamín, Alevín, Infantil, Cadete y Xuvenil B de Lliga Nacional consiguieron alzar el títulu lligueru nes sos respectives competiciones, completando una campaña prácticamente perfecta pa les categoríes inferiores del Real Oviedo.

La guinda a esti añu históricu llegó esti fin de selmana col Benxamín A, que se proclamó Campeón d'España, poniendo'l broche d'oru a una temporada inolvidable. El conxuntu azul volvió situar al Real Oviedo nel más altu del fútbol base nacional y llogró un títulu que yá forma parte de la hestoria del Club. Esti campeonatu supón el tercer Campeonatu d'España de la categoría Benxamín pa la entidá carbayona, tres los llograos en 2014 y 2015.

Más allá de los títulos y los resultaos, esta temporada supón un reconocimientu al modelu de formación del Real Oviedo y al esfuerciu diariu de toles persones que formen parte de la cantera. Xugadores, entrenadores, coordinadores, preparadores físicos, delegaos, families y tolos profesionales que acompañen el medrar de los mozos futbolistes foron pieces fundamentales pa algamar esti ésitu colectivu.

La cantera azul representa ún de los pilares del proyectu del Real Oviedo. La apuesta pola formación, la tresmisión de los valores del Club y el desarrollu integral de los futbolistes sigue siendo una prioridá pa una estructura que sigue medrando y dexando grandes noticies pal presente y el futuru de la entidá.