El Real Oviedo completó na mañana d'esti xueves una nueva sesión d'entrenamientu n'El Requexón, nuna xornada marcada pola recuperación d'efectivos tres el paru internacional. El conxuntu azul contó nuevamente con Fonseca, Viñas y Rahim, yá de vuelta tres los sos compromisos coles sos respectives seleiciones.

 

Los de la capital del Principáu continúen asina cola preparación del alcuentru d'esti domingu, nel que recibirán al Sevilla FC nel Carlos Tartiere. El choque, correspondiente a la 30ª xornada en LALIGA EA Sports, va entamar a les 18:30 hores.

 

La sesión de güei permitió al cuerpu técnicu siguir afinando detalles de cara a un duelu ante'l conxuntu hispalense, col oxetivu d'algamar nes meyores condiciones posibles la cita ante la so afición.

 

L'equipu va volver al trabayu mañana vienres con un entrenamientu a puerta abierta que se va celebrar a partir de les 10:30 hores n'El Requexón, onde los afeccionaos van poder acompañar a los sos na recta final de la preparación del partíu.