El Real Oviedo tornaba al Estadiu Carlos Tartiere col oxetivu claru de volver sumar de trés tres el parón internacional y la dura derrota ante’l Levante UD.

 

Enfrente, un Sevilla FC esixente y tamién necesitáu, en plena llucha por alloñar la zona baxa. Pa esti partíu, el técnicu uruguayu, Guillermo Almada, introduxo la novedá de Dani Calvo nel exe de la zaga, en llugar de Costas, formando pareya con Eric Bailly.

 

El partíu arrancó con munchu pulsu y pocu ritmu. Dos equipos bien ordenaos, firmes atrás, que apenes concedíen. Costaba enllazar xugaes y el balón vivía más tiempu na disputa que nos pies. El Sevilla gozó de les meyores acciones a balón paráu depués de dellos saques d’esquina consecutivos, anque ensin atopar el premiu del gol.

Cuando’l descansu paecía llegar ensin goles, apaeció la estratexa.

 

Nun córner botáu por Reina, emerxó Fede Viñas pa imponese nel área y firmar un cabezazu potente, imposible pal guardameta. El tantu desató al Tartiere y premió al cuadru carbayón, que se marchaba al descansu por delantre tres una primer metá de muncha igualdá. Amás, el cuadru dirixíu por Luis García Plaza quedóse nel 38’ con un futbolista menos pola espulsión direuta de Nianzou tres una entrada mui dura sobre Viñas.

 

Tres el pasu polos vestuarios, el Real Oviedo supo xestionar con intelixencia la ventaya llograda antes del descansu, favorecíu tamién pola superioridá numérica. El conxuntu carbayón amosó madurez sobre’l césped del Estadiu Carlos Tartiere, controlando los tiempos del partíu y evitando que’l Sevilla FC pudiera xenerar peligru real. Los andaluces intentáronlo con más corazón que claridá, pero toparon con un rival bien ordenáu y seguru en toles sos llinies.

 

La portería azul apenes sufrió y Aarón vivió un partíu cómodu. Mentanto, el Real Oviedo dispuso de delles ocasiones p'ampliar la ventaya, pero les intervenciones del guardameta visitante evitaron que’l marcador fuera más ampliu. La entrada de futbolistes como Santi Cazorla, Hassan, Colombatto, Borbas y Raim aportó frescura, dinamismu y una marcha más al equipu, que caltuvo’l control del alcuentru hasta’l pitíu final.

Con esti triunfu, el Real Oviedo suma trés puntos de gran valor que-y permiten volver a la senda de la victoria y encarar d’otra manera’l tramu final de la temporada. El siguiente compromisu llevará a los azules hasta Balaídos, onde se midirán al RC Celta de Vigo el próximu fin de selmana.