El técnicu del Real Oviedo, Guillermo Almada, compareció ante los medios na previa del alcuentru d'esti domingu nel Carlos Tartiere frente al Sevilla, nun duelu clave na llucha pola permanencia.

 

L'entrenador carbayón esplicó que'l parón competitivu condicionó'l trabayu semanal debido a les ausencies: “Entre llesionaos y xugadores con seleiciones tuvimos pocos futbolistes pa trabayar. Contamos col filial pa completar sesiones y intentamos caltener la intensidá nel que viéremos faciendo”. Sicasí, destacó que'l grupu yá ta de nuevu al completu y con ganes de “resarcise del últimu partíu”.

 

Sobre la situación clasificatoria, Almada amosóse firme y optimista: “Díxilu a los xugadores: nun podemos dexar de pelear y lluchar nel campu. Vamos intentalu a muerte, buscando una victoria que mos acerque a la permanencia”.

 

En cuanto al so futuru, el técnicu foi claro: “Táncime en resolver la problemática diaria. Ye un orgullu tar nel Real Oviedo y siento que me sofiten, pero nun podemos distrainos de los partíos que vienen”.

 

Respectu al rival, Almada señaló la versatilidá del conxuntu hispalense: “El Sevilla tien estremaes variantes táctiques y xugadores que pueden adaptase a idees diferentes. Habrá que axustanos, pero tamién buscar ser protagonistes”. Amás, reconoció que esiste “ganes de revancha” tres el partíu de la primer vuelta.

 

El técnicu tamién valoró'l regresu de los internacionales, destacando que “vinieron bien, anque col lóxicu cansanciu de los viaxes”, y admitió que les baxes obligarán a axustar l'once inicial.

 

De cara al tramu final de la temporada, el mensaxe foi contundente: “Si dalgún xugador baxa los brazos nun lo voi tener en cuenta. Tenemos que lluchar hasta'l final, por nós, poles nuestres families y pola afición”. Nesa llinia, recalcó que'l vestiariu ta comprometíu y con intención de reverter la imaxe del últimu alcuentru.

 

Finalmente, Almada insistió en caltener el focu exclusivamente nel presente: “Nun nos pueden distrair les situaciones futures. Debémonos a la nuestra xente y namái hai que pensar n'esta temporada”.