Tal día como güei, un 28 d'abril, nel añu 1946, rindióse-y un cálidu homenaxe a Carlos Tartiere de las Alas Pumariño, presidente del Real Oviedo dende la fundación del club venti años enantes.

Con motivu de que-y fuera concedida pola Delegación Nacional de Deportes la Medaya al Méritu Deportivu a Carlos Tartiere, tributóse-y un homenaxe nel Stadium de Buenavista aquel 28 d'abril, nos prolegómenos del partíu de Copa del Xeneralísimu que enfrentó al Real Oviedo y al Español de Barcelona y que finaría con victoria del equipu carbayón por 3-1.

Col estadiu a rebosar de públicu, diverses entidaes fixéron-y entrega a Carlos Tartiere esi día de plaques y otros regalos como muestra de cariñu y agradecimientu pola so llabor mientres años al serviciu del Real Oviedo y de la sociedá carbayona en xeneral.

Carlos Tartiere finaría'l 31 de xunetu de 1950, cuando cuntaba 50 años d'edá y tres haber presidíu'l Real Oviedo mientres 24 años. En 1958 el Stadium de Buenavista sería bautizáu col nome de Carlos Tartiere.

La fotografía que ilustra esti testu amuesa a Carlos Tartiere, nel centru de la imaxe, el día del so homenaxe en Buenavista, aplaudíu pol públicu del estadiu.