La sala de prensa del Real Oviedo acoyó les palabres de Santi Cazorla tres una derrota especialmente dolorosa nun momentu clave de la temporada. El capitán azul analizó con sinceridá la situación del equipu y apeló al compromisu nel tramu final del campeonatu.

“Foi una derrota dura, sí. Yera un partíu bien importante pa nós. Yá taba difícil, pero agora más”, reconoció Cazorla, visiblemente afeutáu pol resultáu. Sicasí, dexó claro que'l equipu nun baxará los brazos: “Siguiremos intentándolo hasta'l final, pero foi un golpe duru pol cómo se dio too tamién. Más con corazón que con cabeza intentamos dar-y la vuelta”.

El centrucampista insistió en que, mientres haya opciones, el equipu tien de competir al máximu nivel: “Mientres les matemátiques lo digan tenemos que siguir. El Real Betis ye un rival bien complicáu fuera de casa, pero nun se pue ver un equipu muertu. Independientemente de la situación, queremos siguir compitiendo”.

Cazorla tamién fizo autocrítica al analizar los enfrentamientos direutos: “Cuando te xuegues la categoría ente los tos rivales direutos y nun saques nin un puntu ye porque nun has estao a la altor y has sido peor que'l restu. Hai que asumilo”. Nesa llinia, lamentó la falta d'eficacia en partíos clave, recordando alcuentros ante RCD Mallorca y Rayo Vallecano en casa: “Creo que merecimos ganalos y nun lo fiximos”.

L'ovetense señaló que la temporada ta marcada por múltiples factores: “Nun foi fácil y amás el fútbol nun foi xustu. Fiximos méritos pa ser los peores, pero tamién hubo momentos nos que merecimos ganar y nun lo fiximos. Penalizónos muncho'l fútbol, sobre manera en casa”.

A nivel personal, Cazorla nun ocultó la carga emocional del cursu: “Cuando dempués de 24 años asciendes esperes una temporada pa disfrutar… Foi un añu difícil pa toos”. A pesar d’ello, reafirmó’l so compromisu col club: “Disfruté muncho de xugar nel club de la mio vida y quiero siguir faciéndolo nestos partíos que queden”, concluyó.