El futbolista y capitán del Real Oviedo, Santi Cazorla, foi distinguíu col Moscón d’Oru nacional y internacional 2026, un prestixosu galardón que concede l’Asociación Amigos de Grau y que esti añu algama la so 34ª edición.

L’entrega del reconocimientu tuvo llugar esta mañana nes instalaciones de la ciudá deportiva d’El Requexón, nun actu que pon en valor non solo la trayeutoria deportiva del capitán azul, sinón tamién la so dimensión humana.

L’Asociación Amigos de Grau quixo reconocer en Santi Cazorla a un referente que encarna como pocos los valores del deporte: la constancia, el trabayu en equipu, la camaradería y el saber tar tanto nos bonos como nos momentos más complicaos. Unos principios que lu convirtieron en exemplu pa xeneraciones de mozos y que trescienden lo puramente futbolísticu.

El respetu y l’admiración que despierta Cazorla refléxense tamién nos terrenes de xuegu, onde ye habitualmente ovacionáu, incluso por aficiones rivales, como reconocencia a la so trayeutoria y al so comportamientu dientro y fuera del campu.

Con una carrera marcada pola calidá, la personalidá, la sencillez y el compañerismu, Santi Cazorla suma asina un nuevu reconocimientu a la so figura, consolidándose non solo como ún de los grandes nomes del fútbol, sinón como una persona que dignifica’l deporte.

Esti Moscón d’Oru 2026 subraya, en definitiva, el valor d’un futbolista que representa a la perfección l’espíritu del Real Oviedo y del oviedismu.