Tal día como güei, un 16 de xunu, nel añu 1934, los cinco atacantes titulares del Real Oviedo, conocíos como la Delantera Eléctrica, formaron cola selección asturiana en partíu contra la selección de Méxicu.

Amás de la Delantera Eléctrica, los sos integrantes yeren Casuco, Gallart, Lángara, Herrerita y Emilín, tamién formaron parte del once titular n’aquel partíu otros dos xugadores del Real Oviedo; Sirio y Chus.

El Real Oviedo, ún de los equipos más potentes d'España entós, yera la base de la selección asturiana. De los catorce xugadores convocaos pal partíu contra Méxicu, de calter amistosu, nueve pertenecíen al Real Oviedo.

El partíu disputóse nel estadiu d’El Molinón. Asturies venció pol resultáu de 5-2, y los cinco goles del combináu astur foron marcaos por Casuco, Gallart, Lángara, Herrerita y Emilín; ye dicir, pola Delantera Eléctrica.

La selección mexicana viaxara a Europa pa xugar nun solu partíu, contra Estaos Xuníos, en Roma, el pase a la fase final de la Copa del Mundu de 1934. Dicu alcuentru celebróse’l 24 de mayu y foron los estaosunidenses quienes llograron la clasificación pa la fase final del Mundial, polo que la selección mexicana decidió programar dellos partíos amistosos en Europa enantes de tornar a América.

Carlos Laviada, defensa de la selección mexicana que s’enfrentó a la asturiana n’aquel partíu de xunu de 1934, llamó l’atención de los responsables del Real Oviedo. El zaguero mexicanu incorporóse casi de manera inmediata al conxuntu carbayón y convirtióse asina nel primer futbolista non español que xugó nel Real Oviedo.