Tal día como güei, un 7 d'abril, nel añu 1935, el Real Oviedo marcaba'l so gol númberu 100 en Primera División, nun partíu disputáu en San Sebastián contra'l Donostia, denomináu Real Sociedad na actualidá.

El alcuentru, xugáu nel estadiu donostiarra d'Atocha, correspondía a la decimonovena xornada de Lliga, a la cual el Real Oviedo yera llegáu nel tercer puestu de la clasificación.

L'equipu carbayón, cuyo entrenador yera Emilio Sampere, afrontó'l partíu col siguiente once: Florenza, Jesusín, Laviada, Sirio, Soladrero, Chus, Casuco, Gallart, Lángara, Herrerita y Emilín.

Lángara fixo'l primer gol de la tarde nel minutu 6. El Donostia remontó y punxo'l marcador 3-1, resultáu col que se llegó al descansu. Nel minutu 50, Lángara llograba anotar un nuevu tanto, que establecía'l 3-2 y que yera'l gol númberu 100 de los marcaos pol Real Oviedo en Primera División. El conxuntu carbayón marcaría otros tres goles, per mediu de Herrerita, nos minutos 57, 71 y 78, y el partíu concluiría col resultáu de 3-5.

El conxuntu ovetense remataría la temporada en tercer posición y Lángara proclamaríase por segunda vez consecutiva máximu goleador de Primera División.

Na imaxe que ilustra esti testu vese a Lángara controlando'l balón nes inmediaciones de la portería del Donostia.