El Real Oviedo homenaxó esti domingu a María Victoria Rubiera Seco, “Vicky”, nos prolegómenos del alcuentru que enfrentó al conxuntu azul col Getafe CF nel Carlos Tartiere.

Vicky, emplegada del Club dende l'añu 1989, recibió el cariñu y reconocencia de tola familia oviedista tres dedicar prácticamente tola so vida al Real Oviedo, siguiendo amás el lleáu familiar del so padre, Celestino Rubiera, trabayador de la entidá dende 1954 y vinculao al club hasta bien entrada la década de los 2000.

Como reconocencia a tola una vida d'entrega, compromisu y dedicación al escudu azul, los xugadores del Real Oviedo saltaron al terrén de xuegu llevando una camiseta col mensaxe “Una vida dedicada: GRACIES VICKY”, nel momentu d'acceder al campu pa la disputa del alcuentru.

Posteriormente, mientres el line-up previu al entamu del partíu, el videomarcador y la megafonía del Carlos Tartiere dedicaron un emotivu mensaxe a la homenaxada, que se topaba asitiada nel so asientu d'abonada, nuna zona próxima al accesu al terrén de xuegu.

El homenaxe siguió con unes pallabres de reconocencia a la so trayeutoria y lleáu dientro de la entidá azul, destacando los sos casi cuatro décades de serviciu al club y el fondu vencellu de la familia Rubiera cola hestoria del Real Oviedo.

A continuación, el capitán del Real Oviedo, Dani Calvo, fixo entrega d'un ramu de flores a Vicky, que posteriormente realizó el saqué d'honor del alcuentru énte'l conxuntu azulón, recibiendo asina la ovación y el cariñu de tola afición oviedista.