El Real Oviedo punxo en marcha una reorganización interna de cara a la temporada 2026/2027 col oxetivu de reforzar la so estructura institucional y corporativa.

Ún de los principales movimientos dientro del nuevu organigrama ye'l nomamientu de César Martín como nuevu vicepresidente executivu del Club. Hasta agora, l'exfutbolista azul desempeñaba les funciones de direutor de la Fundación Real Oviedo y direutor de Relaciones Institucionales, cargos dende los que desenvolvió una intensa llabor de conexón ente'l club, les instituciones y el texíu social asturianu. El so nuevu cargu supón un reconocimientu a la so trayeutoria y al papel desempeñáu mientres los últimos años dientro de la entidá carbayona.

Otra de les incorporaciones destacaes ye la d'Antonio Virgili, que llega al Real Oviedo como nuevu direutor de planificación estratéxica. Virgili cuenta con una amplia esperiencia en xestión y comunicación institucional. Foi direutor de la RTPA ente 2011 y 2019 y, hasta la so llegada a la entidá ovetense, coordinador xeneral de la Cámara de Comerciu d'Uviéu. La so incorporación busca aportar una visión global y estratéxica al crecimientu del Club nos próximos años.

Na área institucional y de representación, el Real Oviedo refuerza amás la figura de los sos embaxadores. Vicente González-Villamil, históricu exxugador y exentrenador azul, pasa a formar parte del Club como nuevu embaxador.

González-Villamil compartirá responsabilidaes con Carlos Muñoz Cobo, quien va siguir desempeñando un papel fundamental dientro d'esta área. Dende'l so nomamientu como embaxador, Carlos desenvolvió una importante llabor de representación del Club en numberosos actos institucionales, sociales y deportivos, consolidándose como una figura cercana y respeutada tanto dientro como fuera del entornu oviedista.

Por último, dientro del procesu de modernización de la entidá, Rafael Rodríguez incorpórase como nuevu consultor tecnolóxicu. La so función va tar orientada al desenvolvimientu y activación de nueves ferramientes y procesos tecnolóxicos que permitan al club siguir avanzando en materia d'innovación, dixitalización y optimización de recursos.

Con estos cambios, el Real Oviedo da un nuevu pasu na consolidación d'una estructura organizativa que combina esperiencia, conocencia, identidá oviedista y visión de futuru pa afrontar con ambición los retos de la temporada 2026/2027.