Esti mediu díi celebróse nel Córner VIP Alimerka, allugáu nel Espaciu Córner Norte del estadiu Carlos Tartiere, la presentación oficial del alcuerdu de renovación ente'l Real Oviedo y Alimerka, que va siguir vencellada al Club mientres les dos próximes temporaes, hasta la campaña 2027/2028.
L'actu, celebráu a les 13:00 hores, contó cola presencia, por parte d'Alimerka, d'Alejandro Fernández, Presidente, y María Barrado, Directora Comerciar, ente que por parte del Real Oviedo asistieron Martín Peláez, Presidente del Club, y Estela D. Caicoya, Directora de Negociu.
Con esta renovación, Alimerka reafita'l so compromisu col Real Oviedo y col deporte asturianu, fortaleciendo una alianza estratéxica que va siguir impulsando'l medrar de la entidá azul tanto dientro como fuera del terrén de xuegu.
Como parte del alcuerdu, Alimerka va siguir siendo'l patrocinador principal del Real Oviedo Femenín, renovando'l so sofitu a un proyectu que sigue medrando temporada tres temporada. Un patrocinio que tresciende l'ámbitu deportivu y económicu, contribuyendo al desarrollu del fútbol femenín y ufriendo a les xugadores oviedistes distintos beneficios nel so día a día.
Asina mesmu, la compañía asturiana va caltener el Córner VIP Alimerka nel Espaciu Córner Norte del estadiu Carlos Tartiere, un espaciu esclusivu dende'l que los sos clientes van poder disfrutar d'una esperiencia única mientres los partíos del Real Oviedo. A lo llargo de la temporada, van desendolcase distintes promociones y sorteos que van permitir a los clientes d'Alimerka algamar invitaciones y vivir los partíos del conxuntu azul d'una forma especial.
La renovación tamién contempla la presencia de la marca nos principales escenarios del Club, con visibilidá tanto nel estadiu Carlos Tartiere como na Ciudá Deportiva d'El Requexón, reforzando asina la estrecha rellación ente dambes entidaes. Amás, Alimerka va siguir siendo'l patrocinador principal de Garra, la mascota oficial del Real Oviedo.
El Real Oviedo agradez a Alimerka la confianza depositada una temporada más, asina como'l so firme compromisu col medrar del Club, el desarrollu del fútbol femenín y el fortalecimientu del sentimientu oviedista.