El Real Oviedo suma un puntu nel estrenu ligueru nel Carlos Tartiere ante’l Granada CF (0-0), nun partíu nel que’l conxuntu azul foi superior en bona parte del alcuentru y dispunxo de les meyores ocasiones, especialmente nuna primer parte na que namás faltó atopar el camín del gol.

 

L’equipu salió con decisión dende’l pitíu inicial, arropáu por un Carlos Tartiere que vivía’l so primer partíu de Lliga de la temporada. Aarón Escandell, Samu Rodríguez, Dani Calvo, David Costas, Nacho Vidal, Youness, Villahermosa, Reina, Pablo Sáenz, Jacobo y Chris Ramos. Asina salió l’Oviedo nel día d’anguaño.

 

Los nuesos tomaron bien ceo’l control y empezaron a xenerar peligru sobre la portería visitante. David Costas foi’l primeru n’acercase al gol con un remate de cabeza que se foi por bien poco.

 

Poco dempués, Chris Ramos asumió’l protagonismu ofensivu con dos bones acciones que pudieron poner per delantre a los de Calero. Nes dos, sicasí, apaeció Lizoain, acertáu baxo palos, pa evitar que l’Oviedo inaugurase’l marcador.

 

El conxuntu azul siguió insistiendo hasta’l descansu, con una propuesta más ofensiva y llevando’l pesu del partíu. El Granada apenes atopó espacios pa inquietar a un Oviedo que mereció dir per delantre al intermediu, pero’l 0-0 caltúvose.

 

Tres el pasu polos vestuarios, l’equipu volvió salir con ganes de buscar el gol. El partíu, eso sí, foi adquiriendo un calter más trabáu, con menos ocasiones clares y más disputa na zona central. Col pasu de los minutos, Calero movió’l banquillu y modificó los laterales: Juan Cruz y Aisar entraron nel llugar de Nacho Vidal y Samu Rodríguez.

 

L’Oviedo siguió buscando alternatives y, más alantre, llegaron nuevos cambios cola entrada d’Isfan, Víctor Mingo y Enzo Pérez, el mozu canteranu azul que debutó col primer equipu.

 

Y foi precisamente nos últimos compases cuando’l conxuntu azul dio un pasu alantre. A empuxones, col alientu del Tartiere, l’Oviedo foi zarrando al Granada nel so campu y acumulando presencia nes inmediaciones del área visitante. L’equipu intentólo hasta’l final, pero’l gol siguió ensin apaecer.

 

Nun hubo manera de romper la igualdá. El 0-0 foi definitivu y el Real Oviedo suma asina’l so primer puntu de la temporada nel estrenu ligueru ante la so afición.

 

La competición nun da tregua y el próximu fin de selmana’l Tartiere volverá abrir les sos puertes. El CD Leganés será’l siguiente rival, nuna nueva oportunidá pa que’l Real Oviedo busque sumar la primer victoria del cursu.