Desplazábase'l Real Oviedo a tierres xermanes pa enfrentase esta tarde al FC Núremberg de la Bundesliga 2. Formaben d'iniciu los de Calero con: Escandell, Dani Calvo, Costas, Nacho Vidal, Juan Cruz, Reina, Youness, Jacobo, Villahermosa, Isfan y Carlos Fernández.
Dominadores los de Baviera mientres la primer parte y muncho más frescos de piernes. Dos goles, ún nel 9’ y otru nel 18’ facíen xusticia a lo vístu nos primeros 45 minutos de xuegu.
Nada tuvo que ver el cuadru carbayón tres la reanudación. Un equipu que paecía haber recobráu oxíxenu cola pausa y los cambios. Entraron: Chris Ramos, Aldasoro, Pablo S. y Samu y marcharon del terrén de xuegu Juan Cruz, Villahermosa, Ișfan y Carlos Fernández.
Tremendu aguaceru sobre'l céspede del Max-Morlock-Stadion que paecía sentar bien al Real Oviedo que nun tardaría en tener la primer nes botes d'Alberto Reina. Nun conectaba nítidamente col esféricu'l de Chiclana tres pase de la muerte del nuevu 9 del Oviedo.
Buenos minutos del debutante Chris Ramos. Nel 50’ Jacobo llograba conectar ente llinies col gaditanu y el so disparu yera repelíu pol guardameta polacu Robin Lisewski. Nun cesaron ehí los intentos del delanteru carbayón. Lo que podría haber sido un interesante mano a mano ente atacante y porteru convirtióse nun claru derribo a Ramos de Janisch. Últimu home y roja clara.
Xuegu broncu por parte de los de Baviera, patades, multitud de tarxetes pa dambos conxuntos y dureza escesiva pa ser un amistosu de primeros d'agostu que vería la segunda espulsión de la tarde nel 61’. Dura patada a Pablo S. y otru home menos nel FC Núremberg.
Superioridá numérica y asediu constante hasta'l 90’ de los de Calero que güei nun tuvieron suerte de cara a gol. Nueves sustituciones y protagonismu pa ellos. Enzo nel 75’ con un gran disparu que obligó a una entá meyor intervención y Mingo nel 78’ pudieron marcar el primer tantu azul.
Un gol que nun llegaría hasta'l 84’. Y qué gol. Recueye'l balón en banda derecha Pablo S., conduce hacia dientro y cola so zurda coloca'l balón na esquera pa facer inútil l'estirada del cancerberu. Intentólu'l Real Oviedo que merecía un empate que pudo llegar de la cabeza de Marco Esteban, quien tamién cuntó con minutos nel choque. El remate del canteranu foi fuera por bien poco.
Derrota pela mínima nel cuartu partíu de la pretemporada del Real Oviedo, un equipu que torna güei mesmu a territoriu nacional y que sigue afinando la puesta a puntu de cara al entamu lligueru.