Cola baxa por lesión de Toché, Anquela retocó l’once y l’esquema tácticu pa recibir un CD Lugo que llegaba al Carlos Tartiere nun gran estáu de forma. La entrada de Johannesson y Christian nel once fixo formar con una defensa de trés centrales y dos carrileros, con Forlín y Folch nel mediu’l prau y Linares en punta acompañáu d’Aarón y Saúl.
La primer metá foi dura pal conxuntu uviedista, qu’a los diez minutos atopábase col marcador en contra. El CD Lugo anotaba’l primer tantu nuna gran definición de Christian Herrera énte Juan Carlos. Al Real Uviéu costába-y triar área, y les dos ocasiones más clares salieron de botes d’Aarón Ñíguez, con un disparu dende la frontal que coló alto y un remate forciáu n’área pequeña que s’afrelló nun llau de la rede. Christian Fernández salvaba en defensa’l que podía ser el cero a dos pal CD Lugo, y llegaba’l descansu.
Na segunda metá’l Real Uviéu tresformóse y empezó a funcionar. Johannesson y Mossa sumábense con más valentía al ataque, y un valtu d’Aarón Ñíguez n’área supunxo un penalti que diba tresformar Saúl Berjón poniendo les tables en marcador. Pocos minutos depués Linares ponía la firma a la remontada, col dos a un, tres de saque d’esquina. El conxuntu gallegu nun s’achicó y llogró l’empate con gol d’Azeez, pero’l Real Uviéu nun-y dio tregua al equipu de Francisco y apertó hasta atopar el terceru. Diba ser de botes d’Aarón Ñíguez, nuna gran definición a centru de Mossa, tres de xugada con Saúl, en banda esquierda. Llegaba’l tercer gol uviedista, que-y diba dar la victoria al equipu de Juan Antonio Anquela, nuna gran segunda metá que supón trés puntos fundamentales, nun Carlos Tartiere qu’emburrió a los sos hasta’l final.
