XIX Troféu Ramón Losada
Real Uviéu 1 - Real Valladolid 0
Alliniaciones:
Real Uviéu: Juan Carlos; Cotugno, Verdés, Prendes, Viti, Aarón, Hidi, Rocha, Jorge Ortiz, Asier y Toché. Tamién xugaron: Gorka, Álvaro, Josín, Jimmy, Jorge Mier, Juan y Carlos.
Real Valladolid: Masip; Ángel, Calero, Sergio Marcos, Sulayman, Moyano, Antoñito, Toni Villa, Nacho, Alex Pérez y Luis Suárez. Tamién xugaron: Jose, Borja, Mata, Becerra, Deivid, Cotán, Guitian, Míchel, Anuar, Ibán Salvador y Samanes.
Goles: Jorge Ortiz, min 22 (1-0)
El Real Uviéu despidióse de la pretemporada con una victoria énte’l Real Valladolid nel Troféu Ramón Losada de L.luarca, nun partíu seriu y con muncha llegada y pegada del conxuntu uviedista. Anquela volvió da-yos entrada de mano a trés canteranos nel once, con Prendes, Viti y Asier, que, sacante’l primeru por lesión, completaron tol alcuentru, y amosaron un gran nivel. L’equipu uviedista tuvo dende’l principiu allegre n’ataque, con un primer avisu de Toché nos primeros compases del alcuentru, y un remate demasiao forciáu d’Aarón nuna contra, a pase de Jorge Ortiz. Foi esti postreru’l que firmó’l gol de la victoria, rematando a balón paráu una falta tirada por Aarón. Asier pensólo demasiao n’área, y la defensa pucelana tornó, pero Toché tuvo otra clara que Masip foi quién a atayar. La postrera de la primer metá foi pa Jorge Ortiz, que trató de picar un balón francu, y el porteru pucelanu evitó’l gol.
Na segunda parte y ensin cambeos hasta los últimos minutos nun siendo poles molesties de Prendes y Verdés, l’equipu caltúvose seriu en defensa, anque Juan Carlos intervieno con una gran parada nel remate a llanzamientu de falta. Becerra aparó enriba la raya de gol un remate de Toché que foi quién a tocar la cuenta p’acuartar l’esféricu y que llegare con poca fuercia a la portería. Becerra tamién se llució en parada doble, primero a otru remate de Toché y depués en remate a llanzamientu de córner, y Carlos tuvo la postrera pal conxuntu uviedista nos compases finales del alcuentru, col xuegu endurecíu por delles faltes siguíes que dieron por acabáu’l partíu.
El Real Uviéu vuelve a casa pa completar mañana domingu otru entrenamientu más, dende les 10:00 hores n’El Requexón.
