El Real Uviéu coló de vacío en Valladolid, a pesar de que tuvo vivu hasta cuasimente’l descuentu. Con un solu cambéu na alliniación pola ausencia del sancionáu Carlos Hernández, Johannesson entró na alliniación formando na derecha.
Empezó’l partíu con un primer averamientu uviedista, de botes d’Aarón Ñíguez, y la respuesta del Valladolid llegó a balón paráu cuando corríen trés minutos de partíu. A balón paráu Deivid anotaba’l primeru pal conxuntu pucelanu, y el Real Uviéu volvía dir a remolque. De la que pasaben los minutos, el conxuntu de Juan Antonio Anquela aumentaba la posesión y zarraba al Real Valladolid, pero nun yera quién a crear peligru claru. A balón paráu llegaron les ocasiones más clares de los azules, con un remate de Christian Fernández que la defensa unvió a córner, y otra pelota tornada pola zaga local cuando, en llanzamientu de falta de Saúl, Mossa aguardaba nel segundu palu. Folch tuvo la postrera de los primeros cuarenta y cinco minutos unviando’l remate percima del llargueru.
Na segunda’l Real Uviéu ameyoró, y Linares remataba de cabeza, demasiao forciáu n’área, un centru d’Aarón. Entraba Pucko en cuenta de Cotugno tratando de sumar más n’ataque, y a pesar de caltener en tou momentu’l control del balón, el conxuntu uviedista nun yera quién a llegar con claridá. Volvió Aarón a rematar n’área, tapáu polos defenses, y atrapó’l meta local. Entraba Yeboah en cuenta de Saúl pa refrescar l’ataque, y cuando más llegaba’l Real Uviéu apaecía Mata nun remate a balón paráu pa poner el dos a cero a favor del conxuntu pucelanu. Con quince minutos per delantre, l’equipu d’Anquela nun s’encoyó y Steven, que debutó saliendo dende’l bancu, daba un pase pa que Linares acurtiare diferencies y entá pudiere lluchase pol empate. El conxuntu uviedista metíu dafechu n’ataque, y el Real Valladolid que sentenció col trés a un definitivu obra de Míchel.
Lo meyor de la tarde, los 2.000 aficionaos uviedistes desplazaos que despidieron a los sos con aplausos, a pesar de nun poder disfrutar de sumar polo menos un empate p’allargar la bona racha de dos victories siguíes nes últimes xornaes.
