La sala de prensa del Carlos Tartiere foi l’escenariu de la rueda de prensa que Fernando Hierro llevó a cabu como despidida nel bancu del Real Uviéu.
El malagueñu tuvo acompañáu pol presidente de la entidá, Jorge Menéndez Vallina, qu’empezó estimando a Fernando Hierro’l so llabor al frente del bancu carbayón, asegurando que “Fernando y el so equipu fixeron tolo que ta na so mano por consiguir l’oxetivu, ayudaron a ameyorar el club y profesionalizáronlu. Nun hai que señalar a naide, el problema foi de toos y agora toca analizar lo asocedío. Quiero agradecer tolo que fixo nel Real Uviéu y desea-y suerte nel so futuru”.
Pela so parte, el preparador malagueñu fixo balance de los sos once meses al frente del Real Uviéu señalando que “siendo sinceru vini a un proyectu pa facelu medrar, cola mio esperiencia como director deportivu y como manager xeneral, amás de lluchar pol oxetivu. Trabayemos con tol equipu, al qu’agradezo la so profesionalidá y trabayu. Por profesionalidá, trabayu y el día a día marchamos contentos; avanzóse na profesionalización del club. El mio balance del añu ye que tuviemos hasta la xornada 42 lluchando pol oxetivu, soi un ganador y gústame ganar, por eso voi cola espina clavada de nun ver un Tartiere enllenu, nun ver la felicidá de la xente y los trabayadores. Quién me diere poder atopame nun futuru cola xente que m’arrodió nel día a día. Tuviémoslo na mano y marcho con eso dientro, yera polo que veníemos y yera un retu. Intentemos lluchar hasta’l final pero nun pudo llograse. Por profesionalidá, trabayu, sacrificiu... neso marcho contentu, nun tengo nada que refertar nesos aspectos. Tol mundu pue opinar, pero por trabayu, esfuerciu y sacrificiu marcho contentu”.
Tocante a cómo s’asocedieron los acontecimientos y en qué momentu tomó’l determín de nun siguir como técnicu carbayón, Fernando Hierro reconoz que “el llunes a les 9 de la mañana falemos col club. Conversación lóxica, razonable, esponiendo lo que piensa. Tomemos un determín dende la cordialidá, ensin reproches, como lo fixi tola vida. Nós tuviemos mui bona rellación col club, una rellación lóxica, bona y intentando sumar. Escuchémonos y tomemos una decisión bona pa toles partes”. Amás, sobre cómo foi esa conversación, el yá ex-entrenador uviedista destaca que “tomemos la meyor decisión pa les dos partes. Nun ye quién gana nin pierde. La rellación col club nun foi asina, foi conxunto, escuchándonos, entendiendo que yera lo meyor pal futuru”.
Entrugáu sobre cómo ve’l proyectu del Real Uviéu de cara a los años venideros, Fernando Hierro entiende que “cuando llegué equí, fiximos la rueda de prensa y diximos qu’en cuatro años el club tenía que volver a la élite. Yo equí vini a ayudar, a llevar al club a la élite. Toi agradecíu al Grupo Carso por esta oportunidá, foi y ye un placer entrenar al club. Cuando pasen los años siempre voi pensar que’l club y el Grupo Carso diéronme esta oportunidá. Somos xente de fútbol y decidiemos falar al primer añu. El proyectu del club nun camuda, el club tien que volver nun plazu de cuatro años a la élite. Espero que seya l’añu que vien, naguo por que l’uviedismu disfrute col so equipu, ver el Tartiere enllenu. Marchamos con un club más profesional, con más estructura”. Amás, al malagueñu paez-y que “el club tien que siguir medrando y preparase pa volver a la élite. La xente pue opinar, pero, en comparanza colo que nós atopemos, el club dio un reblagu grande. Quién me diere que se prepararen bien pa cuando llegue la élite”.
Tocante a la so esperiencia como entrenador y cómo vivió Uviéu y el Real Uviéu, Fernando Hierro reconoz que “foi una esperiencia maraviyosa entrenar un club como esti, aposté por venir equí pola grandeza y el modelu d’esti club. Dexemos una ufierta pa entrenar fuera d’España que multiplicaba lo d’equí. Foron meses fantásticos y marcho cola conciencia tranquila. Encaré’l retu con valentía, foi un honor ser entrenador d’esti club. Llevo dende ayeri despidiéndome, ye una ciudá exemplar con una bona xente. Viví nel centru y la xente na cai tuvo un comportamientu esquisitu. Voi dexando amigos estraordinarios, gozando de la ciudá... Agora marcho, un par de díes en Madrid y depués a ver a mio madre”. Amás, l’ex-entrenador carbayón quixo tener un recuerdu pa la xente que trabaya nel club, destacando que “anueche despidíme de los trabayadores del club. Utilleros, médicos, personal... son xente col corazón azul, xente estraordinario, que cuando marche van tener equí un amigu. Pagó la pena tar equí, porque esti club tien unos trabayadores maraviyosos”.
Preguntáu sobre’l so futuru, el preparador malagueñu señala que “son rumores. Agora mesmo namás pienso n’acabar. Munchos meses repitiendo lo mesmo, tuvi concentráu na oportunidá de meteme en play off. Agora namás pienso tar cola mio familia y descansar. El futuru nunca se sabe, pero agora mesmo namás me veo cola familia”.
Tocante a les diferencies ente les responsabilidaes como xugador y como técnicu, Fernando Hierro entiende que “son dos coses distintes. Una cosa ye ser xugador y otra ye ser l’entrenador. Nuna tienes un rol y na otra otru. L’entrenador ye’l pá de toles derrotes y ye asina. Ye una teoría del fútbol y nun la vamos camudar. Yo acepté la mio responsabilidá, sabiendo y entendiendo que precisábemos esi pasu pa protexer el club. La esperiencia dicíame que tenía que dar esi pasu pa protexer el club col ruíu qu’hai equí. Fomos quién a llegar hasta la 41 falando namás de fútbol. Trataba de defender el mio club, ye lo que tenía que facer”.
Al respective de la so opinión sobre ónde se perdió la oportunidá d’algamar los puestos de privilexu, al preparador malagueñu paez-y que “si te pones a pensar, ta malo de saber ónde se perdió la oportunidá. Tolos que tuvieron debaxo faen cuentes y el Real Valladolid igual. Lluchemos y quedemos a una victoria. Nesi sentíu, faigo’l mio balance y pienso, pero sé que nun foi por otra cosa que nun fore trabayu y intentalo. Tol mundu pue opinar, pero nel global marcho contentu y col aquello de nun consiguir el play off. Toi contentu por lluchar pol oxetivu, pero cola espina clavada de nun ver un Tartiere enllenu lluchando pol play off. Fomos profesionales, con defectos y virtúes, pero nun nos faltó trabayu y esfuerciu”.
A la fin, preguntáu sobre un conseyu pal futuru entrenador, Fernando Hierro foi rotundu: “Diría-y que viniere. Ye un gran club, una gran ciudá y que tenga suerte. El retu paga la pena. A cualquiera que m’entrugue diría-y que fore colos güeyos zarraos y que xuba a Primera. Nun me siento con reproches, lo que tuvi que dicir dígolo internamente. Gústame trabayar n’equipu, de puertes pa dientro”, sentenció’l malagueñu.
Gracies por too, Fernando. Y muncha suerte nel to camín.
