Derrota énte’l Getafe nel Coliseum

El Real Oviedo viaxaba hasta Getafe pa encarar una nueva xornada lliguera lloñe del Carlos Tartiere. Tres el trunfu énte la Real Sociedad na casa, los homes de Paunovic llegaben a esta cita con confianza y con ganes d’algamar los sos primeros puntos a domicilio. El parón por seleiciones y les baxes fixeron que viéremos un once distintu güei formáu por: Aarón Escandell, Nacho Vidal, Dani Calvo, David Costas, Javi López, Reina, Dendoncker, Ilic, Hassan, Brekalo y Forés.

 

El sol y la hora fixeron mella dende’l primer minutu y el xuegu foi lentu. Cuando namái transcurrieron los primeros 15 minutos de partíu, Nacho Vidal, tres un golpe na cabeza con Diego Rico, cayó al suelu y tuvo que ser sustituyíu por posible conmoción cerebral. Lucas Ahijado entraba al campu y el llateral valencianu tenía que dexar el terrén en ambulancha.

 

Dempués de la mala noticia, el partíu reanudábase ensin munchu cambéu con respeuto a lo vistu hasta entós. Les ocasiones apenas llegaben pa dengún de los dos equipos y el ritmu siguía baxu. Cuando paecía que’l choque llegaría con 0-0 al descansu, dos aiciones a balón parao de los de Bordalás poníen el 2-0 nel marcador. Mario Martín y Borja Mayoral fueron los encargados de materializar dambes ocasiones y facer que’l Getafe se fuera al descansu con ventaya. El Oviedo pudo tener el primeru nes botes de Reina pero’l so disparu dende fuera del área estrellóse nel travesañu.

 

Tres el pasu per vestuarios, Paunovic dio entrada a Cazorla, Viñas y Colombatto. Los nuesos intentaben tener más posesión de balón pa xenerar peligru sobre la meta de Soria pero les ocasiones nun llegaben. Rahim y Carmo tamién tuvieron minutos más alantre anque nada camudó. Ya na recta final del choque, Viñas foi espulsáu por roja direuta y l’Oviedo quedó con ún menos pa los últimos diez minutos de partíu.

 

Xarru d’agua fría pal conxuntu azul que vuelve a Asturies con una derrota. Con tiempu pelantre pa reflexonar y trabayar, l’equipu yá piensa nel so próximu compromisu lliguer énte’l Elche CF nel Martínez Valero.